El Tribunal Supremu acaba cola oficialidá en Llangréu

El Tribunal Supremu unvió al Conceyu de Llangréu la resolución definitiva que desanicia la declaración d'Oficialidá de la Llingua Asturiana nel conceyu que se ficiere n'agostu de 1997, cuando Izquierda Xunida llevaba l'alcaldía llangreana.

La sentencia del Supremu concueya y vien a sofitar la del Tribunal Superior de Xusticia d'Asturies, que-y diere la razón a la demanda del anterior delegáu del Gobiernu Fernando Fernández Noval, quien reaccionó contra les declaraciones d'oficialidá qu'apautaren ente 1997 y 1998 una riestra de conceyos asturianos (Bimenes, Llangréu, Castrillón y Casu) y tamién contra les Ordenances Municipales d'usu del asturianu de Nava, les primeres que s'aprenbaren nel país.

Dase la circunstancia de que la sentencia del Tribunal Superior de Xusticia d'Asturies foi la más sangrina de toles que salieren contra l'asturianu. Ello ye que la sentencia contra l'asturianu en Llangréu, el conceyu más grande en que l'asturianu taba reconocíu como cooficial diba más allá que la impugnación de oficialidá en Castrillón o que la retirada de les ordenances municipales en Nava. Según la sentencia, cursinos pa funcionarios, rotulaciones de cais y carreteres etc quedaríen dafechu prohibíes.

Yá d'aquella, el conceyu llangreanu dio anuncia de que la Oficina de Normalización diba seguir trabayando, y esta nueva sentencia, cola que yá se contaba, nun va torgar el llabor de la oficina. El responsable de la mesma, Eloy Antuña, esplicó que tienen yá pa salir una guía turística billingüe del conceyu y que van entamar una campaña d'espardimientu del usu del asturianu colos comercios del conceyu, ente otres actividaes. Contra la sentencia del Supremu, cabe recursu énte'l Constitucional, pero nun parez que l'Ayuntamientu vaya recurrir