El Tribunal Superior d'Asturies almite'l recursu poles papeletes electorales n'asturianu

La formación nacionalista Andecha Astur dio anuncia ayeri de que la Sección Segunda de la Sala de lo Contencioso Alministrativo del Tribunal Superior de Xusticia d'Asturies almitió a trámite'l recursu d'Andecha contra la decisión de la Xunta Electoral que con fecha del 9 de marzu de 2004 refugaba la homologación de les papeletes electorales redactaes n'asturianu coles qu'Andecha Astur quería presentase a les elecciones del 14 de marzu.

La Xunta Electoral echó p'atrás les papeletes d'Andecha Astur col argumentu de que nun s'axustaben al modelu oficial". Énte esta situación, AA interpunxo demanda por vulneración de los derechos fundamentales de la persona pa poder tener asina un tratamientu d'urxencia que-y diere prioridá a la demanda d'Andecha penriba d'otros asuntos que tuviere tratando la Sala, que ta acabante de pidi-y a la Xunta Electoral l'espediente pol asuntu de les papeletes n'asturianu xunta les alegaciones que quiera amestar.

La organización nacionalista pidió tamién la suspensión temporal del alcuerdu d'anulación de los votos emitíos con papeletes n'asturianu, que llegaron a emplegase en delles escueles el día de la votación, rexistrándose situaciones distintes a la hora del recuentu.

Según espliquen dende Andecha Astur, la Xunta Electoral unvió la resolución dando orden de nun aceptar les papeletes n'asturianu a la mayoría de les meses. Ello ye que, anque munches meses acataron el mandáu de la Xunta, n'otres, incluso teneniendo la carta cola resolución mandando refugar les papeletes, estes llegaron a almitise, mientres que en delles refugáronles, pero alegando "defectu de forma" ensin facer referencia a la resolución de la Xunta.