El Supremu almite la denuncia d'Asturies contra'l decretu qu'apauta la cuota llechera

La Sala Tercera de lo Contencioso-Alministrativo del Tribunal Supremu almitió ayeri a trámite'l recursu contenciosu-alministrativu que punxere'l 17 de xunetu la Conseyería de Mediu Rural y Pesca del Principáu contra'l RD del Ministeriu d'Agricultura 347/2003 qu'apauta'l sistema de vienda y compra de cuota llechera dende esti añu

La Conseyería de Mediu Rural y Pesca recurrió'l Real Decretu por considerar que "incumplía la normativa comunitario, concretamente no que diz sobre tresferencia de cuota ensin esplotación". Ello ye que la norma europea contempla la tresferencia de cuota ente esplotaciones ensin tresferir la esplotación, pero ello namás como escepción a la norma y en casu de fuerza mayor. La Conseyería mesma y los sindicatos agrarios concueyen en qu'esta normativa nueva tien consecuencies terribles pa la ganadería asturiana al permitir que la cuota que-y correspuende a Asturies marche pa otres comunidaes ensin que l'alministración asturiana pueda atayar esa fuga. Hasta qu'echó a andar el Real Decretu, Asturies sí tenía mecanismos propios pa pone-y pilancos al escape de cuota a otres comunidaes.Ello yera posible torgando la vienda de cuota en casu de qu'el titular fuere perceptor d'ayudes, colo que se cortaba pela freba la posible fuga, pero la lliberalización que supunxo'l Real Decretu desanició esta posibilidá y asina'l volume de lleche que se viende a comunidaes de fuera disparóse dende les 2.000 tonelaes que se vendieron na campaña 2002-2003 a les más de 9.000 que se lleven nesta campaña 2.000-2.004 según datos de la Conseyería,anque'l sindicatu COAG, en rueda de prensa que dio sobre esti asuntu'l mes pasáu, xubió'l volume de la sangría a más de 10.000 tonelaes.

La Conseyería felicitóse pola almisión a trámite de la denuncia, pero tamién dixo que nun pieslla la puerte a una salida negociada col Ministeriu pa frenar o compensar l'efectu negativu del Real Decretu na ganadería asturiana.