El Sporting sufrió p'atropar trés puntos

El Sporting sufrió muncho más de la cuenta pa ganar a un Castellón que vieno al Molinón de colista y que dende'l primer cuartu d'hora quedó con diez al quedar espulsáu'l porteru por arrebañar la pelota coles manes fuera del área nuna entrada de Calandria.

Sicasí, el Castellón nun acusó'l gúelpe y apertó-y al Sporting, qu'amorió desnortiáu pel campu tola primer parte. Anque faltos de remate, los futbolistes del Castellón rondaron tol primer tiempu la portería d'un Roberto que tuvo de facer delles intervenciones, les más p'atayar balones llargos. Pela otra parte, el Sporting tuvo cuásimente desapaecíu del campu, y nin siquiera la decisión de Ciriaco Cano de da-y entrada a Biagini xunto con calandria pa xugar con dos delanteros aprovechando la superioridá de númberu consiguió entornar el xuegu cobarde d'un Sporting que llegó a enfadar al públicu.

Nel segundu tiempu l'equipu local punxo algo más d'enfotu y foi garrando confienza mientres el Castellón se metía nel so campu a defender l'empate a cero. A partir del minutu 60 del partíu llegó la fase más intersante del Sporting, con Xuan y sobremanera con Pablo Álvarez afuracando peles bandes y buscando'l remate de los dos arxentinos. Foi precisamente gracies a un centru de Pablo que Calandria consiguió adelantase a la defensa del Castellón pa meter el primeru. Cola tranquilidá de dir per delantre, el Sporting esfrutó la posesión del balón y entró nuna fase d'ataque na que'l linnier anuló-y un gol a Calandria por orsay y na que llegó'l segundu, obra del central Jorge nun centru de Juan. El de Prevera fartucóse ayeri nos tiros de falta, nos que tuvo a puntu de conbseuir otros dos goles, sobremanera nuna que diba milimetrada a la base del palu de la portería pero que l'arrebatedor suplente del Castellón, Javier Fernández, paró nuna bona actuación.