El Sporting prescinde d'Herrera y piensa en Baraja como sustitutu

Pese a nun haber confirmación oficial por parte del club, el téunicu catalán nun va volver a entrenar al equipu xixonés.

Too facía pensar que'l partíu col Tenerife del domingu (18 hores, El Molinón) diba ser la prueba de fueu definitiva de Paco Herrera pa reconducir el rumbu de la nave roxiblanca hasta la llegada del parón navidiegu y la esperable llegada de refuercios y recuperación de lesionaos, pero ayeri dellos medios especializaos adelantaben la decisión de la entidá de destituyir al ex xugador del Sporting. La imaxe pésima del club roxiblancu'l vienres nel Mini Estadi col filial del Barcelona, con derrota por 2-1, y la falta de moral que dexó ver l'entrenador na rueda de prensa pesaron a la hora de la toma d'esta decisión.

El Sporting ocupa, depués de 18 xornaes, el puestu númberu 10 con 24 puntos, a 9 del ascensu direuto y a 5 de les eliminatories de promoción, tres sumar el mesmu númberu de trunfos, empates y derrotes: 6. Depués de ganar nel Reinu de Lleón a la Cultural por 1-2, na xornada 9, l'equipu d'Herrera sumó namái una victoria –na 12 al Almería (2-0)–, 4 empates y 4 derrotes, les dos últimes consecutives. En total, 7 puntos de 27 que dexen a los xixoneses lloñe del oxetivu de la temporada.

El 'Pipo', l'escoyíu

Rubén, el 'Pipo', Baraja ye'l téunicu escoyíu pol Sporting pa sustituyir a Herrera, una decisión sorprendente pol cambiu de criteriu na direición deportiva, pasando d'apostar pola veteranía del catalán a reforciarse con un entrenador de poca esperiencia na categoría. El vallisoletanu, depués d'entrenar un partíu al Valencia Mestalla, dio'l saltu a Segunda División na temporada 2015-2016 de la mano del Elche, col que finalizó undécimu.

La temporada pasada, tres refugar la renovación col club ilicitanu, sustituyó'l 8 de payares a José Ramón Sandoval al frente del Rayo, ensin poder acabar la temporada al nun reconducir la trayeutoria del conxuntu de Vallecas nes 13 xornaes que tuvo nel bancu: 3 victories, 4 empates y 6 derrotes. Míchel, actual entrenador de los madrilanos, foi'l relevu de Baraja en febreru.