El Sporting nun foi a remachar al líder

Incluso estráu de baxes, el Sporting enseñó esti sábadu n'Almería un fútbolo que foi'l que-y valió la otra campaña pa ponese en puestu d'ascensu. L'equipu de Marcelino García Toral firmó un primer tiempu de llibru nel que s'adelantó de penalti forzáu por Jeffrey y convertíu por Ismael, l'únicu xugador de la plantiya que tien agora mesmo a l'afición d'El Molinón.

La falta de tiru a puerta foi otra vegada'l mayor enemigu d'un Sporting que mandó nel xuegu a lo llargo de tola primer parte y bien de la segunda. Dempués d'adelantase nel minutu 16, el Sporting tuvo ocasiones pa facer más dañu, pero marchó pa los vestuarios ensin ser a enanchar la diferencia. El segundu tiempu siguió cola mesma receta que'l primeru, y nin los cambeos del entrenador ejidense Pepe Mel foron a iguar la situación, col Sporting controlando atrás y rebatiando, munchos metros per delantre de la portería de Roberto, tolos balones que quería meter el Ejido, pero nel minutu 73 Manolo mandó un balón axustáu al palu que punxo l'empate en marcador. Poco dempués, l'árbitro, Gregorio Bernabé, enseñó-y la tarxeta encarnada al entrenador del Ejido Pepe Mel, por protestar, y nun-y faltaba razón pa ello. Bernabé falló muncho el sábadu, protagonizando un arbitraxe alloriante que dañó muncho a los dos equipos, anque más al Ejido, al perdoná-y un penalty bien claru al Sporting.

El resume pal Sporting nun ye positivu. Col puntu en campu del líder, l'equipu de Xixón tien yá nueve puntos na clasificación, pero la llista de futbolistes mancaos ye yá de diez. Samuel, el central de Villaviciosa, tien mancada una rodiella, anque nun se sabe lo grave que pueda ser, y siguen en dique secu los defenses Isma, Chus Bravo, Carmena y Cristian, los centrales Pablo Lago y Chus y los delanteros Calandria, Biagini y Arthuro. Sicasí, Pablo Lago yá participa nos entrenos, y lo mesmo elli que los dos delanteros arxentinos podríen tar disponibles pal partíu de copa col Elche.