El Sporting fuerza l’empate en Soria

Nun mal partíu nel que los dos conxuntos acabaron con 10 futbolistes caún, l'equipu de Marcelino empató nel últimu intre, algamando un resultáu que-y val pa siguir na llucha poles places d'ascensu

El Sporting amarró un empate col segundu clasificáu que-y val pa siguir col ascensu a tiru piedra. Un puntu separta a los asturianos coles places del privilexu cuando falten seyes xornaes pa rematar l'añu de competición. Sicasí, la meyor campaña del Sporting de Xixón dende que baxó a segunda nun ta acabando de la meyor manera. L'equipu xuega peor en cada partíu y lo d'ayeri nun foi una escepción nuna llinia cláramente descendente según s'alleguen los partíos decisivos. Entovía más, de nun ser porque tolos rivales directos del Sporting lleven dos selmanes siguíes empatando, l'ascensu taría agora a una distancia insalvable.

La suerte vieno ayeri de focicu pa contra'l Sporting en Soria. Dempués de dos ocasiones clares pa dambos conxuntos, la del Xixón pa Miguel y la del Numancia pa Rosu, l'árbitrio espulsaba a Octavio a los venti minutos de xuegu, abriéndo-y el cielu a un Sporting que diba un poco a remolque del rival. Sicasí, el Sporting nun supo aprovechalo, y Julio Pineda punxo otra vegada'l peligru al pasar un balón pemriba la portería asturiana. Ensin ser a aprovechar la superioridá numérica, el Sporting quedó con diez pola segunda mariella de Juan, colo que'l Numancia fizo entovía más dañu nes llinies asturianes. Asina foi que nel minutu 61 Juan Carlos Moreno aprovechó un fallu de llibru de la defensa del Sporting pa poner el 1-0.

El fallu del Numancia entós foi'l de zarrase atrás a aguantar el resultáu, y l'aciertu del Sporting foron los cambeos. Sastre entró por un Bilic que nun tuvo la tarde y David Bauzá dexó-y el sitiu a Rubén. El fíu de Cundi foi'l revolvín del Sporting nel final del partíu y trabayó a destayu pa sacar l'empate. El defensa Yago falló por poco al rematar de cabeza un balón que-y apurriere'l pequeñu delanteru, pero Ismael aprovechó otru pase del mesmu Rubén pa remachar a la rede a siete minutos del final, forzando un empate que val muncho pa la parroquia de Mareo.