El Sporting firma la permanencia en Primera

|
El Sporting firma la permanencia en Primera

El trunfu col Villarreal y el pinchazu del Getafe nel Villamarín dexen a los xixoneses na máxima categoría un añu más.

L'afición del Sporting vivió ayeri otra xornada cabera d'infartu, anque nesta ocasión los nervios foron menores gracies al madrugador tantu de Jony que dexaba a los del Pitu Abelardo a espenses de lo que fixera'l Getafe col Betis nel Benito Villamarín. Tres 45 minutos nos que'l Villarreal tuvo la ocasión d'empatar con un disparu al palu de Léo Baptistão, el Sporting llegaba al descansu salváu, col Rayo pendiente de que los castellonense algamaren l'empate y ocupar el puestu de permanencia: 1-0 n'El Molinón, 0-0 en Sevilla y 2-0 en Vallecas.

Tres una ocasión clarísima del ex roxiblancu Stefan Šćepović, llegaba la llocura a un Molinón pendiente de la radio: gol de Pezzella de cabeza al rematar una falta llateral. L'ex de River facía de Caballero. Otra vegada un arxentín facilitaba al Sporting la so estancia en Primera. Sicasí, un tantu posible del Villarreal mandaba a los roxiblancos a Segunda y daba la permanencia a un Rayo que, pese a un gol de Verza de penalti, amarraba'l partíu al marcar el terceru.

La tranquilidá absoluta llegaría nel minutu 79, cuando Sanabria en llinia de fondu retrasaba'l balón a la frontal del área pa que Sergio Álvarez lo golpiara col alma y sentenciara'l partíu. Pentemedies, el Betis marcaba'l segundu de penalti y, al poco del final, el Getafe recortaba diferencies. Trunfu del Betis por 2-1 y del Sporting por 2-0 que permitía a los del Pitu finar la Lliga nel decimosétimu puestu, el que marcó'l téunicu al principiu de temporada como l'oxetivu y l'últimu que da la permanencia.

Descensu del filial a Tercera

La nota negativa de la xornada foi'l descensu del filial del Sporting, que pese a derrotar por 3-0 al Guijuelo vio como'l Cacereño facía los sos deberes y ganaba n'Izarra por 1-2. Al final, decimosétimu puestu, qu'en Segunda División B significa descensu, mentes que los estremeños van tener la oportunidá de xugar la eliminatoria pola permanencia. Pela so parte, el Lealtad ganaba por 1-3 en Las Gaunas al UD Logroñés y finaba la temporada nuna meritoria décima posición.

Tamién terminaba ayeri la Tercera División que yá conocía campeón, el Caudal, y a dos de los sos acompañantes na llucha pol ascensu, el UP Langreo y l'Avilés. El cuartu va ser finalmente el Marino tres una escelente segunda vuelta, al nun fallar na so visita al Llanes (0-2), quedando'l Tuilla a un puntu del cuartu puestu. El sortéu va celebrase esta tarde, a les 17 hores, en Las Rozas.

Na zona baxa, descienden el Roces, l'Astur y el Gijón Industrial, col Urraca arrastráu a Preferente col descensu del Sporting B tres perder en Colunga por 3-2 y ver como'l Club Siero ganaba 3-1 al Roces. Los de Posada necesitaríen un ascensu d'un equipu asturianu pa poder caltaner la categoría.

Contador Estadistiques