El Sporting fai furacu

Les baxes n'alliniación titular cola que suel xugar Marcelino nun menguaron la capacidá d'un Sporting qu'ayeri amestó otru trunfu más a la llista, esta vegada contra l'Algeciras, que va l'últimu. L'equipu asturianu abre un furacu mui grande na tabla clasificatoria sobre los sos rivales pol ascensu.

Anque la primer parte tuvo en manes del equipu local, una perda de balón de Tevenet nel minutu 9 fabricó la xugada qu'adelantó al Xixón con gol de Bilic. Pela so parte, la defensa asturiana tarazó les entraes de Bayarri y Armentano, ayudando asina al rebatiador del equipu asturianu na so carrera por valtiar el récord ensin recibir un gol. Mientres Roberto diba camín de los 727 minutos ensin que se-y cuele un balón, Bilic aumentaba la cuenta visitante rematando al segundu palu un centru de Juan. Nel segundu tiempu l'Algeciras presentóse con trés cambeos, pero ello nun valió pa contra un Sporting que tien la meyor defensa de la categoría. Rubén marcó nel minutu 74 el tercer gol y entós yá nun hubo más partíu. El Sporting nun quixo aprovechase y l'afición local acabó aplaudiendo a Roberto por superar el récord d'imbatibilidá d'Emilio Isierte, que taba en 707 minutos. La diferencia col Getafe, tercer clasificáu y que cierra les places d'ascensu, yá ye d'ocho puntos.