El Sporting camienta nun garrar entraes pal derbi

El dispositivu de seguridá del domingu nel Carlos Tartiere Nuevu (16 hores) xenera polémica pola diferencia de criterios.

La Xunta de Seguridá celebrada esta mañana rescampló la falta absoluta de rellaición ente'l Sporting y el club azul. La entidá carbayona caltién le rellaciones rotes con Mareo, a pesar de los intentos de comunicación sobre'l partíu fechos dende Xixón, como amuesa tamién que nun s'entame la tradicional xinta de direutives previa al partíu, y la falta d'alcuerdos pa flexibilizar la llegada d'aficionaos roxiblancos fai posible qu'haya un derbi ensin afición visitante per primer vegada.

El Sporting camienta nun garrar les entraes al considerar que les condiciones pa viaxar son escesives, más col horariu puestu por LaLiga pal partíu. Éstes son iguales que la de los dos años anteriores, esto ye, los siguidores deberíen presentase a les 12 n'El Molinón, cuatro hores enantes del derbi, pa desplazase al Tartiere n'autocares escoltaos.

La falta d'alcuerdu ente clubes obliga a caltener esti modelu a pesar de que la Delegación del Gobiernu estatal n'Asturies apostaba por facilitar l'accesu de siguidores al campu. L'Uviéu nun vía bien que dambes aficiones compartan espacios, pero sí defendía acurtiar tiempos del desplazamientu, dalgo que dende la Policía refugaron por cuestiones operatives, mentes que'l Sporting nun aceptaba distinciones ente los socios del so equipu, saliendo en defensa de los radicales del antiguu Fondu Mozu, onde s'asitia Ultra Boys.

A lo llargo de la tarde espera conocese la decisión definitiva del Sporting nuna situación que nun fai otra que cargase la gran fiesta del fútbol asturianu.

Na imaxe, zona onde s'asitia l'afición visitante nel Tartiere. Semeya obra de rsg baxo llicencia CC BY-SA 2.5 ES.