El Sporting B va xugase l'ascensu col Olot

|

El restu d'eliminatories son Cristo Atlético-Avilés, UP Langreo-Almería B y CD Tuilla-UD San Fernando (Maspalomas).

El campeón asturianu de Tercera División, el Sporting B, nun tuvo suerte nel sortéu, al tener qu'enfrentase al vencedor del siempre potente grupu catalán: l'Olot. Los de José Alberto, sicasí, yá demostraron en Copa Federación que son quien a plantar cara a conxuntos catalanes de la Segunda División B, como puedo vivir nes sos carnes el Badalona (quintu clasificáu a un puntu del play-off).

El partíu d'ida va tener llugar en Mareo esti domingu al meudía, pa xugar la vuelta nel Estadi Municipal d'Olot la fin de selmana siguiente, campu de yerba natural con aforu de 4.000 espectadores. Ramón Calderé ye'l téunicu del conxuntu catalán, nel que milita l'ex del Uvieú Héctor Simón, que suma la so tercer campaña n'Olot.

L'equipu que gane esta eliminatoria asciende de manera direuta a Segunda División B, mentes que'l perdedor tendrá que buscar el saltu de categoría afrontando dos eliminatories más.

L'Avilés y el Tuiya, con debutantes

La vía llarga ye la que van siguir los otros trés conxuntos asturianos clasificaos pal play-off. L'Avilés va tener como rival nel primer cruce al Cristo Atlético, conxuntu palentín que debuta nuna fase d'ascensu, con primer partíu'l domingu en La Balastera a partir de les 17.30 hores.

Un filial va ser el rival del Llangréu, rival que podría nun xubir definitivamente en casu del descensu final del primer equipu, que paez tar sacando la cabeza tres tar munches xornaes en puestos de peligru. Trátase del Almería B, que va visitar primero Ganzábal esti domingu a les 18 hores.

El cuartu clasificáu, el Tuiya va tener que garrar l'avión pa enfrentase al San Fernando canariu, otru debutante nuna fase d'ascensu. La ida va disputase n'El Candín el domingu al meudía.

 

Contador Estadistiques