El Sporting B remonta y yá espera rival

El filial roxiblanco ganó 2-0 al Almería B nun partíu nel que se mostró superior al andaluz.

Los de José Alberto López van disputar la ronda definitiva pol ascensu a Segunda División B tres dar la vuelta al 1-0 rexistráu na ida nel Estadio de los Juegos Mediterráneos. Arropáu por numberosu públicu en Mareo, el Sporting igualó la eliminatoria nel minutu 17 gracies a un penalti por manu de Soufiane, que tresformó Isma Cerro.

Tres el tantu, el Sporting B siguió dominando'l partíu ente un Almería B mui físicu, anque nun se pondría con ventaya nel global hasta depués del descansu, nel minutu 49, gracies una gran aición individual de Claudio, que, tres dexar atrás con un quiebru a Soufiane, superó al meta Batalla na so salida picando'l balón. El guión del choque nun cambió tres el gol, y los andaluces, pese a qu'intentaron aproximase a la portería de Dani Martín, nun xeneraron peligru nidiu.

Esta tarde, a les 16.30 hores, el filial xixonés va conocer el so rival, que podría ser un cuartu, tercer o segundu clasificáu. La vuelta, poro, va ser siempre en Mareo.

Derbi en Segunda

L'Uviéu finó esti sábadu la temporada regular de Segunda División con un trunfu énte l'Elche por 0-2 que nun-y sirvió pa metese en play-off poles victories del Valladolid (1-0 al Cádiz) y del Huesca (1-2 al Levante), siendo l'equipu aragonés el sestu clasificáu, puestu que permite xugar el play-off pol ascensu. Asina, les eliminatories pa conocer l'equipu que va acompañar al Levante y al Girona a Primera División van ser Huesca-Getafe y Cádiz-Tenerife.

La octava plaza final del conxuntu carbayón, a dos puntos del sestu puestu, supón la vuelta del derbi asturianu por cuenta del descensu del Sporting, partíu que nun se celebra dende'l 2003, tamién en Segunda División. Otra manera, na xornada cabera de la competición perdió la categoría l'UCAM Murcia tres perder 1-0 col Nàstic, choque onde namái-y valía'l trunfu polos resultaos daos n'otros campos. Los murcianos acompañen asina a Segunda División B al Mirandés, al Elche y al Mallorca.

La Cultural y el debutante Lorca Fútbol Club son los equipos que consiguieron l'ascensu dende Segunda B. Los otros dos puestos van salir de los ganadores de les eliminatories Barcelona B-Real Racing Club y Valencia Mestalla-Albacete.

Na semeya, Isma Cerro, autor del primer gol del Sporting B, dispónse a sacar un córner.