El splitboard abre pasu n’Asturies

|

Esta fin de selmana va tener llugar en Sotres el II Manzana Split Festival, una de les cites de splitboard más importantes del Estáu. Esta modalidá deportiva en puxanza n'Asturies axunta snowboard, montaña y esquí de travesía.

El Sasquatch Astur Splitboarding Qlub organiza esti eventu que va aconceyar a 81 splitboarders procedentes de distintos puntos del Estáu col oxetivu de “promocionar esta modalidá deportiva, asina como la gastronomía y la montaña asturiana, con Sotres como marcu inigualable”, esplica Juan Sánchez, el so presidente y direutor de la prueba, non competitiva. D’esta forma, dende güei hasta’l domingu, los participantes van concentrase nesti pueblu del conceyu de Cabrales, dende onde mañana van partir a facer rutes pela zona –el domingu ta prevista un ‘splitgincana’ por pareyes y delles actividaes–. Éstes, que dependen de la meteorología, van adaptase al nivel de cada splitboarder, dende los que faen el so bautismu a los que tienen un nivel mediu o altu.

Pero muncha xente entrugaráse, ¿qué ye’l splitboard? “Trátase d’una actividá deportiva qu’axunta snow, montaña y esquí de travesía. Consiste nuna tabla de snow que se divide en dos esquís de travesía, colos que se fai l’ascensu, con pieles de foca y bastones. Llueu, estos esquís xúnense pa facer la baxada, convirtiéndose nuna tabla de snow”, esplica Sánchez. Pese a que la disciplina nun ye nueva, ésta ta garrando puxanza a nivel internacional “por ser una alternativa más asequible pa los aficionaos al snowboard”. N’Asturies, el Sasquatch Astur Splitboarding Qlub, fundáu nel 2012 –aunque furrulando como grupu dende’l 2010– como continuidá del inautivu Sasquatch Astur Snowboarding Qlub, ye l’únicu del país y axunta 22 deportistes que faen rutes per tola montaña asturiana, sobre manera en Picos d’Europa y Redes; tamién n’estaciones d’esquí, pero fuera de pista. “Préstanos disfrutar del paisaxe maraviyosu que tenemos”, añade’l so presidente.

El Manzana Split Festival ye una perbona oportunidá pa conocer esti deporte y l’ambiente que xenera la prueba en Sotres, anque dende la organización apunten que’l tiempu esistente estos díes va obligar a los participantes a xubir a cotes altes en busca de nieve. D’esta forma, namái los amantes del trekking van poder averase a zones cercanes a les rutes previstes pa presenciar les baxaes espectaculares qu’ufren los prauticantes de splitboard, una modalidá qu’abre pasu nes montañes asturianes.

Na semeya, dalgunos miembros del Sasquatch Astur Splitboarding Qlub nuna imaxe promocional.

 

Contador Estadistiques