El sieglu XX nun veleru

El "Kruzenshtern", el segundu barcu de vela más grande del mundu, aparó estos díes n'Asturies. Atracáu en Puertu d'El Musel de Xixón, el veleru rusu pudo visitase a lo llargo del día d'ayeri, rexistrando una asistencia abondante de públicu.

Con 114 metros, el cascu de fierru remachao d'esti veleru de 77 años d'antigüedá ye'l segundu más grande del mundu, con namás dos metros menos que'l "Sedov" l'otru xigante rusu de la navegación a vela. Pero más que les sos 5.750 tonelaes o los palos de 55 metros d'altura, lo que más llama l'atención ye la historia del barcu.

Construyíu en 1926 nos astilleros alemanes de de Bremerhaven, en tiempos de la república de Weimar, el "Padua" que foi como primero se llamó esti impresionante barcu, trabayó faciendo la ruta del nitratu ente Hamburgo y Chile, pasando pel famosu Cabu d'Hornos, escenariu de bien de desgracies navales. Al serviciu de la compañía de F. Laeisz, el Padua foi de los últimos veleros en facer esta ruta. Ello nun ye casualidá, y ye que l'armador Ferdinand Laeisz foi l'últimu empresariu que s'enfotó na vela nun tiempu en que la navegación a vapor y motor diesel yá desaniciare los palos y les veles de tolos puertos del mundu. Tien el so aquello románticu que nos años 20 Laeisz caltuviere una flota de 56 veleros de 2.000 tonelaes de carga caún carretando pelos siete mares cargamentos de toa triba que ganaben bien de veces nel trayectu a los barcos de vapor, que daquella garraben velocidaes de 10-12 ñudos. N'acabando la ruta del nitratu, la compañía empobinó'l barcu hacia otru destín tamién bien llonxanu, nada menos que la ruta del maíz ente Alemaña y Australia, un viaxe que'l Padua facía... en 67 díes.

En llegando la Segunda Guerra mundial, el Padua, cola bandera de la esvástica nazi, abandonó les grandes travesíes y quedó faciendo trayectos curtios ente puertos alemanes, dacuando funcionando como gabarra y tiráu por un remolcador, pero la historia del barcu diba dar un reblagu definitivu n'acabando la guerra cola derrota del exe. Al repartise los efectivos de la flota d'Alemaña ente los ganadores, el Padua quedó en manes de la Unión Soviética, que-y cambió'l nome pol que tien agora n'alcordanza del explorador rusu Ivan Fiodorovich Kruzenshtern.

Sicasí, el destín del barcu quedó un poco al debalu hasta 1959, en que l'estáu soviéticu decidió remocicalu, poniéndo-y unos motores ausiliares y reparándolu a conciencia. A lo llargo de los 60, el Kruzensthern participó en campañes científiques y d'esploración, a la vez qu'entrenaba a los cadetes de la marina rusa. Tres de la cayida de la URSS, el gobiernu rusu apautó en 1992 cedé-y el barcu a la escuela de Marina Civil de Kaliningrado, que lu convirtió en buque escuela, llabor que vien faciendo d'entós p'acá. Dende losaños 70, el Kruzenshterhn ye tamién un fixu nes regates de grandes barcos de vela, como la Cutty Sark o la Tall Ships race.

Precisamente les apretures económiques peles que pasa Rusia obliguen a la xerencia del barcu a sacá-y tol rendimientu que pueden pa poder seguir con elli a flote. Por 75 euros al día, cualquier persona pue apuntase y viaxar col barcu, trabayando como ún más xunta la tripulación, y por daqué más pue contratase'l barcu pa pequeños viaxes particulares. por supuesto, la venta de recuerdos ye otra fonte d'ingresos. Nesta web puedes ver una galería de semeyes del barcu