El Shakespeare más asturianu llega a Llangréu

Ricardo'l Terceru ye la primer obra de Shakespeare representada en llingua asturiana, un intentu nel que se ye capaz de describir toles esperiencies vitales del ser humanu colos elementos propios d´una llingua. Ye ésti un apueste pergrande, un pasu más camín de la normalización de la nuesa llingua que nunca nun pue pasar desapercibida nel panorama cultural asturianu.


Ricardo´l Terceru ye la primer obra de Shakespeare en llingua asturiana una versión de José Rico, direutor y actor protagonista, fecha sobre la torna de Milio Rodríguez Cueto de la traxedia de William Shakespeare The King Richard II.

Ricardo´l Terceru ye una de les obres más enrevesaes del teatru Shakespearianu: los numberosos personaxes, caún coles sos intenciones, mieos y razones pa la traición o l´alianza, a favor o escontra Ricardo, quien a lo llargo d´esta complicada traxedia histórica nun dexa, nin per un solu momentu, de desplicanos les sos propies razones pa la maquinación, la intriga, la hipocresía, la mentira o´l crime. Ye l´espeyu d´una llucha encarnizada pol poder. Ye´l drama del ambiciosu supremu: deforme, resentíu, consciente, astutu y cruel y sensible al empar, calculador y imprudente. Con too y con ello Ricardo ye un villanu simpáticu, que nun engaña a naide; él confiesa que quier tar, cualesquier que seya´l preciu, nel poder y ye responsable y consecuente colos actos de so.

El montaxe de Bacanal Teatru tresllada l'ambientación orixinal del final de la Guerra de les Dos Roses a la siderurxa actual, convirtiendo la llucha socesoria en lluches sindicales y pola propiedá de la empresa. Too ello con una escenografía de muncha envergadura. El vestuariu, de la diseñadora asturiana Arancha Regueras, inspiróse en ropa de trabayu: fundes, monos... Ye una propuesta provocativa graciosa dacuando, y desconcertante, anque´l testu caltiénse siempre fiel al orixinal.
Esta versión en llingua asturiana de The King Richard III, ye anguaño vixente, ye un drama nel que se narra la llucha pola corona: que ye la llucha pol poder, seya políticu o empresarial, daqué que tamos avezaos a ser testigos tolos díes.


El Rei Ricardo'l Terceru represéntase mañana Vienres 19 de marzu en Teatru Nuevu de La Felguera a les 20:15h. Les entraes cuesten 6 euros