El salariu mínimu va pasar de 900 a 950 euros

|
Xunta ministra Yolanda Díaz con sindicatos y patronal SMI

La ministra de Trabayu y Economía Social, Yolanda Díaz Pérez, anunció esti miércoles, tres una xunta con sindicatos y patronal, la xuba del Salariu Mínimu Interprofesional (SMI) en 50 euros, un aumentu del 5,5 por cientu. La cantidá definitiva queda en 950 euros, col oxetivu d’algamar los 1.200 euros al final de la llexislatura.

Esti aumentu procede del “diálogu colos axentes sociales” y del “mandatu de la mayoría social”, apuntó Díaz Pérez nel momentu de la anuncia, pasaes les 19 hores d’ayeri. Foi depués d’aconceyar con representantes de los sindicatos CC OO y UXT y de les organizaciones empresariales CEOE y CEPYME.

A diferencia de la xubida anterior del SMI, aprobáu n’avientu del 2018 tres l’alcuerdu ente PSOE y Xuníes Podemos pal apoyu de los presupuestos de Pedro Sánchez, pasando de 735 euros a 900, nesta ocasión llega d’alcuerdu consensuáu. Xuníes Podemos y los sindicatos aspiraben a llegar a los 1.000 euros, pero finalmente s’asitio la cifra en 950, dalgo que la patronal celebró como un mal menor.

La xuba, que será con calter retroactivu dende’l 1 de xineru, tendrá “un impautu global en más de dos millones de trabayadores, a falta d’evaluar la incidencia que tendrá nos emplegos a tiempu parcial”, aseguró la ministra, ún de los nomamientos de Xuníes Podemos, que defendió’l “diálogu con mayúsculas, coldu con coldu, con tolos axentes sociales”. La intención del Gobiernu de coalición ye finar la llexislatura afitando’l SMI al nivel que marca la Carta Social Europea, esto ye, al 60 por cientu del salariu mediu del estáu, una cantidá que n’España taría cercana a los 1.200 euros.

Na semeya, Díaz Pérez con, d'izquierda a derecha, Pepe Álvarez (UXT), Unai Sordo (CC OO), Antonio Garamendi (CEOE) y Gerardo Cueva (CEPYME).

Contador Estadistiques