El proyeutu Falamos de formación n’asturianu y gallego-asturiano p’adultos, qu’arranca en seronda, busca profesores

|
Llibreta clases

La Federación Asturiana de Conceyos (FACC) ta acabante d’espublizar una ufierta de trabayu buscando profesoráu d'asturianu y gallego-asturiano a media xornada pal proyeutu d’enseñu non regláu p’adultos d’estos dos idiomes a lo llargo del territoriu. Ésti finalmente va llevar el nome de Falamos en cuenta del anunciáu nun primer momentu ‘Faladera’.

La Direición Xeneral de Política Llingüística, la Rede de Normalización Llingüística y la FACC collaboren na puesta en marcha d’esta iniciativa que busca cubrir “la demanda qu'hai anguaño d’aprendimientu d’asturianu y eonaviego”, espresó Berta Piñán, conseyera de Cultura, Política Llingüística y Turismu, na presentación na Comisión de Facienda de los proyeutos del so departamentu nos Presupuestos Xenerales d’esti añu. Finalmente va desendolcase en seronda, cola previsión de que los diez trabayadores que se van contratar pa esti llabor s’incorporen el 12 de setiembre.

El contratu, a media xornada, va allargase hasta avientu y los cursos van ser en llinia semipresenciales con un llargor de 42 hores. Pa formar parte de la bolsa de docentes ye necesario ser maestru de Primaria o Secundaria y tar inscritu nel Rexistru Xeneral de Capacitación n’Asturianu y en Gallego-asturiano o tener el C1 de Llingua Asturiana; tar en posesión del Mínor en Lengua Asturiana; tener el Máster de Formación de Profesoráu y el C1; impartir polo menos 100 hores na formación de dalgún de los dos idiomes; o trabayar nun Serviciu de Normalización Llingüística y poner polo menos 50 hores de formación.

Coles persones que s’inscriban nesta ufierta va facese un procesu de seleición pa contar con 10 profesores y crear una bolsa de docentes pa convocatories futures de Falamos. Gracies a esta iniciativa cualquier persona n’edá adulta va poder deprender o afondar nel so conocimientu del asturianu y del gallego-asturiano y preparase pa presentase a los títulos de certificación adaptaos al Marcu Común Européu de Referencia pa les Llingües, que nel casu del de la llingua del occidente ta pendiente del decretu que va regulala, en tramitación alministrativa nestos momentos.

P'acceder a la ufierta de trabayu ha calcar equí.

Contador Estadistiques