El proyectu del Meicín llega al Ministeriu de Cultura

Depués de llegar al Tribunal Superior de Xusticia d'Asturies y a la Xunión Europea, la Plataforma pa la Defensa de Penubina ta acabante de poner una quexa en Ministeriu d'Educación, Cultura y Deportes, que ye una de les entidaes que financiaríen la obra, sobre les irregularidaes que-y abulta a esti colectivu que tan produciéndose na tramitación del proyectu pa facer el refuxu nuevu na Vega del Meicin, en L.lena.

La plataforma esplica que nel añu 2002 el Conseyeru d'Educación y Cultura yá anulare la tramitación en cuantes que la obra nun tenía estudiu d'impactuambiental, anulación que se repitió el 9 d'ochobre del 2002, esta vegada por irregularidaes nel trámite d'información pública del estudiu d'impactu, y otra vegada más el 13 d'avientu d'esi añu, cuando la noticia salió en BOPA. Un añu dempués, el 16 d'ochobre de 2003, el proyectu diose de pasu, y el 6 de payares el BOPA dio anuncia de la licitación de la obra, ello ensin que s'iguaren los defectos que llevaron a anteriores suspensiones. La resurrección del proyectu pal refuxu del Meicín saldose con cerca de 1.000 escritos d'alegación ente los qu'hai 9 de clubes de montañismu, 14 de grupos ecoloxistes, sindicatos y profesores de la Universidá d'Uviéu. El proyectu pa l'ampliación ye enforma polémicu en cuantes que supón la demolición del edificiu actual y la construcción d'otru nuevu con tres altures col doble de volume y capacidá.

La plataforma entiende que tendríen de proponese a lo menos dos alternatives, y ellos mesmos proponen qu'una d'elles tendría de ser la d'asitiar el refuxu en pueblu de Tuiza Riba, pueblu a bien poca distancia de la vega del Meicín y con accesu rodáu y toles infraestructures necesaries. La otra alternativa sedría la reparación del refuxu actual pero ensin recrecelu como se tien pensao pa facer un edificiu de trés altures. pa tener más información sobre esti asuntu, la plataforma tien una web especial na rede