El principáu va tasar la gasolina

El principáu d'Asturies trataba nel Conseyu de Gobiernu d'esta mañana'l marcu xeneral del Presupuestu del Principáu pal 2004, nel que s'enxerta'l recargu sobre la gasolina, que dende'l 1 de xineru va tasar con 0,024 euros cada llitru que los automovilistes asturianos echen al depósitu del coche. Asina, por cada 25 llitros de combustible que se-y pongan al coche, los asturianos vamos pagar 60 céntimos más n'impuestos (100 pesetes). Sicasí, parez que la tasa nun va ser llineal, y asina, los colectivos profesionales, casu de los tresportistes, van tener esenciones.

La xustificación pa poner esta tasa nun ye otra que la financiación de la sanidá asturiana. La sanidá ye la competencia más cara que xestiona'l Principáu, y ente los sos gastos fixos ta'l de personal (13.300 trabayadores en plantilla), ello xunta otres factures como la del gastu en farmacia o el mantenimientu de les instalaciones, 7 hospitales públicos, 5 concertaos y 78 centros de salú. A estos gastos comunes, a la sanidá asturiana xúntase-y agora otra carga cola financiación del proyectu del Hospital Universitariu d'Asturies, un proyectu acabante de revisar y que pasó de presupuestase en 60 millones d'euros a presupuestase en más del doble de la cantidá prevista.

La tasa sobre los combustibles creóla'l gobiernu estatal del PP como un puerte que-yos dexaba abiertu a les autonomíes pa poder xubir ingresos depués de la retirada y conxelación de dellos impuestos básicos pa les autonomíes, casu del IAE. Poner la tasa ye optativo, y de momentu namás dos comunidaes autónomes l'aprebaron, Galicia y Madrid, dambes con gobiernu del PP, colo que ye la primer vegada qu'una autonomía gobernada pola izquierda acepta esta igua fiscal, que por ser de calter indirectu, ello ye, sobre'l consumu y non sobre la propiedá, va contra los principios hitóricos que defende la izquierda en materia fiscal. El presidente asturianu tien dicho qu'Asturies vese obligada a aplicar la tasa por culpa de la "desllealtá financiera del Gobiernu central coles comunidaes autónomes". Ello ye que, aparte de la retirada d'impuestos que xestionaben les CCAA, Madrid negóse tamién a firmar un conveniu col Principáu pa financiar l'hospital nuevu, anque sí firmó conveniu con Cantabria (gobernada pol PP) pa remocicar l'hospital de Valdecilla. Pela so parte, Jesús Iglesias, coordinador d'Izquierda Xunida, dixo l'otru día nuna entrevista que anque aplicar esta tasa nun ye que-y preste a la so organización, la implantación de la tasa ye obligattoria pola situación financiera en que metió'l gobiernu del PP a les comunidaes autónomes. Laura González, d'IX, quitó-y importancia a la tasa y dixo tamién nuna entrevista que la tasa "nun va notala naide porque ye mui pequeña". Pequeña o non, los2,4 céntimos d'euru por llitru son la tasa más alta que dexa poner la llei a les CCAA

En Conceyu Abiertu proponemos una encuesta nueva ¿tas d'alcuerdu cola tasa sobre la gasolina?