El Principáu presenta proyectos en Cangas

El Presidente asturianu, Vicente Álvarez Areces, presentó'l proyectu del Gobiernu pa dellos edificios emblemáticos del conceyu de Cangas del Narcea, ente ellos el Monesteriu de Courias o'l Palaciu d'Omaña. Baxo'l títulu "Nuevo Siglo" el plan de reutilización del monesteriu enxértase nel Plan Complementariu de Reactivación de les Comarques Mineres, y preténdese instalar nel xigantescu edificiu un conxuntu d'actividaes formatives, culturales y d'emplegu que permitan recuperar esti importantísimu patrimoniu y convertilu de nueves en guañu de l'actividá cultural y económica del conceyu de Cangas del Narcea.

La inversión na compra del edificiu benedictín foi de 6.010.000 € (1.000 millones de pesetes), y nos años prósimos cuenten con instalase nel monesteriu un Centru de la Madera que valga pa formar profesionales del sector y recuperar asina oficios tradicionales del conceyu y potenciar la industria del mueble de calidá.

Xunta esto, presentose'l proyectu pa la nueva Casa de la Cultura asitiada en Palaciu d'Omaña, que l'ayuntamientu y el Principáu mercaron faciendo una inversión conxunta de 601.012 . La creación del Muséu del Vinu, como sofitu a la creación de la denominación d'orixe "Vinos de Cangas" y de la Casa del Agua ponen el total de la inversión en cerca de 3 millones d'euros que vienen a xuntase a los que salieron del Plan de Reactivación de les Comarques Mineres.