El Principáu echa la cuenta de la marea prieto

El mesmu día en que se dio anuncia de que Rodolfo Martín Villa, comisionáu especial del gobiernu del Estáu na catástrofe del Prestige diba dexar el cargu porque la crisis yá taba iguada, el Principáu d'Asturies asoleyó una nota oficial de prensa de la Conseyería de Xusticia, Seguridá y Relaciones Públiques en que se fai balance del efectu de la marea prieto n'Asturies. L'executivu astur cuídase de nun facer referencia directa a la dimisión de Martín Villa, pero, queriendo o non, vien a retrucalu indirectamente alvirtiendo que les consecuencies del Prestige son un asuntu entovía "ensin resolver".

En primer llugar, el Principáu echa cuentes de les perres que tuvo que poner hasta agora pa enfrentase a la marea prieto. El gastu n'equipos de llimpieza, contratación de personal y les salides del helicópteru del Principáu faen un total de 6 millones d'euros puestos pola alministración asturiana a los qu'hai qu'axuntar otru millón y mediu que tuvieron que poner los conceyos afectaos.

Amás d'esti gastu directu depués d'ocho meses de marea prieto, el Principáu alvierte que'l galipote sigue entrando a la costa asturiana, con "consecuencies directes nel sector pesqueru, la calidá mediuambiental y nel ámbitu turísticu". Nesti sentíu, el Principáu diz que los daños del prestige nun puen medise namás como suma de gastos asumíos poles alministraciones, y entiende qu'hai daños más difíciles d'emponderar en yérminos de perres na calidá de vida de la población, los ecosistemes costeros y de los fondos marinos, el caladeru y les especies comerciales y el sector turísticu.