El Principáu acepta la propuesta de financiación del déficit sanitariu

El Conseyeru d'Economía Jaime Rabanal votó a favor
ayeri nel Conseyu de Política Fiscal y Financiera. D'esta manera
Asturies acepta la propuesta de Zapatero que va suponer p'Asturies 104 millones
adicionales según calcula'l propiu conseyeru. Con too y con ello esta
aportación adicional nun cubre'l déficit dafechu.



Jaime Rabanal almitió ayeri que la propuesta del gobiernu
español nun cubre dafechu'l déficiti financieru que xenera'l
sistema sanitariu asturianu. Dende'l Principáu calculase que la
propuesta de Zapatero va suponer p'Asturies 104 millones d'euros anuales,
cuando'l déficit anual anda ente 120 y 130 millones d'euros. De toes
maneres Rabanal considera positivu l'alcuerdu porque representa una
"meyora de la situación anterior, garantiza un principiu de
solidaridá y supón un anticipu d'ingresos que soluciona problemes
d'ayalguería".



Álvarez Areces tamién amosó la so
satisfacción pol alcuerdu declarando ayeri que "tenemos,
afortunadamente, un país que garantiza la igualdá nel accesu a
los servicios públicos, a tolos ciudadanos, con independencia
d'ónde vivan", y qu'esti alcuerdu ye "fundamental pa la meyora
de la financiación de la sanidá, que ye'l serviciu
públicu, l'únicu qu'afecta al cien por cien de la
población".



No que cinca al control del gastu sanitariu, el presidente asturianu
declaró que "hai que tomar medies, medies que vayan al fondu, pero
para eses medies tien qu'ayudanos la sociedá". El presidente del
executivu adelantó dalgunes de les medies pa controlar esi gastu como
por exemplu la centralización de les compres del sistema sanitariu,
l'usu de medicamentos xenéricos y la utilización adecuada y
racional de munches de les tecnoloxíes que tien el sistema sanitariu.
Estes otres actuaciones, según Álvarez Areces, tien que sirvir
p'asegura-y un futuru al sistema sanitariu español al que que
definió como "esta gran riqueza que tenemos n'España, que
nun la tienen países desarrollaos como EE.UU".