El prestige, a debate

A lo llargo de los prósimos díes van cellebrase delles conferencies y actos públicos que van tratar, dende estremaes perspectives, sobre la marea negra del Prestige.Pa entamar, esti sábadu 25 la organización política Lliberación organiza a les 12 de la mañana en Centru de Cultura Antiguu Institutu de Xixón una charra y una proyección d'un vídeu sobre la situación en Galicia cola presencia d'Antón Masa, doctor en Bioloxía, presidente de l'Asociación de Defensa de la Ría de Pontevadra y miembru de la plataforma Nunca Mais. La segunda cita va ser n'Uviéu, onde'l grupu de profesores de la Facultá de Bioloxía que ta trabayando nel tema va organizar una xornada de debate y información dende un enfoque multidisciplinar. Ello va ser el miércoles 29, nuna sesión que va entamar a les 4 la tarde nel edificiu históricu de la Universidá d'Uviéu y que va cuntar con ponencies d'Horacio Montes Coto, del departamentu de Construcción y Inxeniería de la Fabricación, quien va falar de les causes y consecuencies del accidente, del profesor de Bioloxía d'organismos y sistemes José Luis Acuña, que va analizalo dende'l puntu de vista ecolóxicu, y de Antonio López Cerezo, profesor de filosofía que va dar un enfoque de les consecuencies sociolóxiques del fenómenu del Prestige.