El PP tien sede en Nueva York

Ayeri enterámonos de que'l Partíu Popular tien una oficina nada menos que na ciudá de Nueva York. El llabor d'esta sede, escuru por demás hasta agora, esclariose una migaya al conocer la carta que s'unvió dende esta oficina a la comunidá asturiana na Gran Manzana y que la Cadena Ser tuvo'l detalle de colgar na rede. Na carta, los responsables del PP neoyorquín piden el votu pal PP nes prósimes autonómiques, emplegando pa ello tola retafila d'argumentos que se-yos pasaron pela cabeza. La carta afita que, gracies al PP España ye una potencia europea penriba de Francia y Alemaña, yendo meyor que con cualquier otru gobiernu socialista o comunista, y diz qu'agora les coses llévense con eficiencia, non como cola "chapuza sociata". Pa demostrar que la española ye una economía con puxu, la increyible carta diz que n'España "tienen trabayu hasta los moros", y pa xustificar el sofitu al ataque a Iraq afirma que los EUA y Gran Bretaña son los nuestros amiguinos naturales, y non los franceses, qu'anduvieron tirándonos y quemándonos los camiones de verdura. Tan de verdá y tan espelurciante como pue vese na carta orixinal que remata despidiéndose "Por España, por su unidad y por su grandeza"