El PP de Villaviciosa nun s’aclara col asturianu

Como informó Asturies.com, l'equipu de Gobiernu Municipal de Villaviciosa comprometióse a llegar a un consensu pa regular l'usu del asturianu nel conceyu, depués de recibir dos propuestes del PSOE y del conceyal Mundo Collada (ex-PAS) nesi sen. El teniente d'alcalde (y daquella alcalde en funciones por tar Martínez Cobián de viaxe) comprometióse públicamente a tratar l'asuntu nuna Xunta de Portavoces. Pero ello ye qu'agora ye'l propiu alcalde'l que precisa que "como muncho trataráse nuna comisión de cultura".
Ensin embargu, l'anuncia anterior del teniente d'alcalde partía d'un alcuerdu por unanimidá de tolos grupos (PP, PSOE, URAS y Agrupación Asturianista nun plenu del 30 de xineru.
Que l'asuntu se trate nuna Xunta de Portavoces o na Comisión de Cultura nun altera'l conteníu nin la validez del posible alcuerdu algamáu, pero sí la composición de los representantes encargaos de consensualu. Asina por exemplu URAS nun ta representada na Comisión de Cultura, polo que Collada propunxo invitalos a la mesma, cosa que desestimó'l propiu alcalde.