El portal musical Fnast.net vuelve a l’actividá

|

Vuelve a l’actividá la publicación dixital sobre’l panorama musical fechu n’Asturies, Fnast.net. Tres d’un parón de cuatro meses, esti proyectu informativu afirma que regresa “porque ye necesariu que Fnast.net exista”.

Fnast.net nació en xineru de 2009 como continuación dixital del fancín impresu “Fechu n’Asturies”. Dende’l so surdimientu lleva puxando polos soníos trabayaos n’Asturies en tolos sos ámbitos: rock, folk, hiphop, hardcore, metal…; naguando dende’l principiu por convertise nun puntu d’alcuentru pa los músicos y públicu asturianos.

“Foi un descansu pa garrar fuerces, pa facer cambios y, sobre too, pa reafirmanos na opinión de que ye necesariu que Fnast.net exista”, declara Xicu Ariza, coordinador del proyectu. Esa necesidá vien porque, según Ariza, existe “una escena musical con capacidaes pero, por desgracia, sufrimos d’unes instituciones públiques y unos medios mayoritarios que tapen los oyíos cuando suena’l son fechu n’Asturies”.

Pal coordinador del portal musical hai “una crisis cultural n’Asturies”, y exemplificó l’afirmación cola programación gubernamental pal 8 de setiembre y la decisión de la Conseyería de Cultura sobre Lorient. Por eso defende que “ye necesaria la creación d’espacios, d’iniciatives, de puntos d’alcuentru, onde la música fecha n’Asturies calténgase viva y garre’l puxu necesariu p’algamar la dignidá que se merez”.

Collaboración con Asturies.com

D’otra miente, esti proyectu informativu apoyó dende’l entamu, al traviés de les llicencies Creative Commons, una circulación de la información ensin llendes restrictives. Asina ye como va entamar a collaborar con ASTURIES.COM compartiendo material informativu rellacionáu cola música asturiana de raigañu.
 

Contador Estadistiques