El Plan Especial de Tresporte a Los Llagos suma’l mayor númberu d’usuarios dende la so creación nel 2015

Un total de 211.908 persones xubieron a Los Llagos al traviés del plan especial de tresporte esti añu, 54.694 más que nel 2016, medra motivada tamién pol aumentu de díes en Selmana Santa. Supón la cifra más alta dende la so creación nel 2015, cuando sumó 138.548.

Namái nos cinco díes nel que tuvo operativu n’avientu, coincidiendo coles festividaes de la Constitución y la Inmaculada Concepción, hubo 6.486 viaxeros nuevos. N’avientu, el día que más usuarios se rexistraron foi’l xueves, con 2.498, siguíu del sábadu, con 1.715.

Nel cómputu total de 2017, el mes que contabilizó más viaxeros volvió a ser agostu, con 95.504. El serviciu de tresporte públicu a Los Llagos tuvo en vigor en Selmana Santa, del 8 al 16 d’abril, pasando de los cuatro díes habituales a nueve; y nes pontes festives del 29 d’abril al 1 de mayu, del 12 al 15 d’ochobre y del 6 a 10 d’avientu, y del 1 de xunetu al 17 de setiembre, cola esceición del 25 de xunetu y el 8 de setiembre.

Nel 2016 el plan rexistró un total de 157.214 usuarios, 54.694 menos qu’esti añu. La cifra supera de forma considerable la del 2015, cuando 138.548 usuarios visitaron esti enclave de Picos nos servicios d'autobuses y taxis llanzadera habilitaos pol Consorciu de Tresporte d’Asturies.