El petróleu, en másimos dende 1990

Les males estadístiques d'Estaos Uníos xunta l'altu riesgu d'una crisis pola ablucante xuba del preciu del petroleu tiraron p'abaxo pelos mercaos bursátiles del mundu. La comunidá inversora pon-yos frenu a les inversiones nes bolses mentanto que la situación xeopolítica mundial nun tien traza de meyorar.

El datu que tiró p'abaxo de toles bolses foi'l de desempléu d'Estaos Xuníos. El casu ye que na primer economía del mundu creáronse'l mes pasáu 288.000 trabayos. Un bon datu pal mercáu llaboral pero un resultáu nun previstu y que-y da más pesu a la posibilidá d'una xuba de tipos d'interés nos Estaos Uuníos. La Reserva Federal tien pensao xubir los tipos nel próximu mes de xunu, y esto asusta sobremanera a los inversores que ya dexaron claro que nun van siguir col apueste pola renta variable .

Wall Street tuvo una mala selmana con cayíes penriba'l 1% hasta los 1.917,16 puntos nel casu del Nasdaq y hasta los 10.177,34 puntos nel casu del Dow Jones. Nel Vieyu Continente les perdes superaron el 0,5% en Llondres, París y Frankfurt.

La Bolsa de Madrid foi una de les afectaes poles cayíes. Asina, l'índiz Ibex-35 trancó nos 8.027 puntos, raspiando la cota de los 8.000 y acumulando cuatro selmanes siguíes en perdes, lo que nun se daba dende'l 2002. Sicasí, el volume de negociu foi históricu, con 4.384 millones d'euros. Abultaes perdes ente los blue chips: BBVA, SCH, Sogecable, TPI y Amadeus. El Grupu Telefónica nun tuvo bona selmana, y diose anuncia del interés de la filial Terra de vender el portal Lycos. La constructora gallega Fadesa, acabante de salir al mercáu, perdió'l preciu de salida de la OPA, y ente los pocos valores que pesllaron en positivo destacaron Abertis, Iberia y Altadis.

Máximu preciu del petroleu dende 1990: 37 dólares barril. Los economistes dende los organismos internacionales ya tan anunciando del riesgu d'una crisis enerxética que podría llevar a una recesión económica a más d'un país industrializáu. El riesgu ye grande, porque la situación xeopolítica ye cada vegada peor cola situación d'Oriente Mediu y la ocupación d'Iraq. L'oru prieto ta poniendo difícil la recuperación económica de países europeos como Francia y Alemaña, y la dependencia del petroleu va tirar p'arriba pelos precios y poner a preba los mercaos llaborales de dellos países énte la perda de competitividá de munches industries qu'ello va llevar arreyao.

D'otra manera, los países de la OPEP nun tienen interés nengún en caltener precios d'estabilidá na raya de los 25 dólares barril. Los países importadores de petroleu yá tan presionando sobre los productores.

Nel mercáu de renta fixo la próxima xuba nos tipos d'interés d'Estaos Xuníos tiró p'abaxo pelos bonos. Como exemplu'l bonu alemán pasó d'una rentabilidá del 4,30% a una del 4,20%, y según los negociadores de contratos de futuru de la tasa interbancaria d'Estaos Xuníos hai un 90% posibilidaes de que la próxima xuba de tipos de la Reserva Federal seya de 0,25 puntos. Otramiente, l'euru sigue perdiendo tarrén frente a un dólar cada vegada con más fuercia. El metal amariello cotizó nos mínimos d'ochobre del 2003, marcando 379 dólares la onza dempués d'ocho selmanes perdiendo valor.