El PAS suspende a los críticos

La plataforma crítica qu'un grupu de militantes del Partíu Asturianista intentaron constituyir va quince díes ta amenazada de muerte. Ayeri, caún de los firmantes del manifiestu críticu cola actual xestión de la histórica formación asturianista recibió un burofax en que se-yos alvertía que taben suspensos de militancia y que teníen abiertu espediente sancionador. Según les normes de réxime internu del PAS, los críticos tienen un plazu de siete díes pa presentar recursu, viniendo darréu d'ello la espulsión definitiva en casu de nun aceptase los motivos que s'aleguen pa torgala. Los miembros de la plataforma critica yá avisaron de que cuenten con poner el nomáu recursu, que van presentar a últimos d'esta selmana.

La dirección del PAS quier cortar pela freba col últimu sector críticu que-y salió a la organización, y ye que pasaron namás quince díes contaos dende la presentación de la corriente el 1 d'avientu y esta amenaza d'espulsión. El documentu constituyente de la corriente crítica firmábenlu José Manuel Balbuena, que foi candidatu a l'alcaldía de Xixón. Otros firmantes del manifiestu yeren César Fernández, miembru de la Xunta Nacional del PAS, Isidro Molina, que foi candidatu a l'alcaldía de Villaviciosa, Enrique Rodríguez Garrido, vicesecretariu de l'agrupación de Xixón y Xabiel García Pañeda, secretariu de Xuventú Asturianista.