El PAS echa a Balbuena

El Partíu Asturianista sigue en procesu de crisis trés de les elecciones del 14 de marzu, en que la formación pasó por poco de los 4.000 votos. L'históricu partíu de Xuan Xosé Sánchez Vicente, que lleva cinco años perdiendo en votu y en militancia, ta acabante d'espulsar a José Manuel Balbuena, integrante más destacáu de la plataforma de miembros de la corriente crítica que se formare dientro'l PAS nel mes d'avientu.

Nun va un añu que la cara de José Manuel Balbuena taba pegada peles casi de Xixón pidiendo'l votu pal PAS nes municipales del 25 de mayu del 2.003. Naquella cita, el candidatu del PAS sacó 3.478 votos y la del PAS foi la cuarta llista más votada nel conceyu, algamando en Xixón un resultáu meyor que'l de 1999 mientres el partíu llevaba un sapiazu gordu n'otros conceyos importantes y baxaba en total más de 4.500 votos nes autonómiques.

N'avientu, y tres del congresu en que s'analizaron los resultaos del PAS, Balbuena y otros militantes del partíu, casu de César Fernández, miembru de la Xunta Nacional del PAS o Xabiel García Pañeda, secretariu de Xuventú Asturianista, llegaben a la conclusión de que nun había propósitu d'enmienda na organización y de que'l barcu históricu del asturianismu diba ensin gobiernu y derechu pa contra les piedres. Énte esta situación, el grupu de Balbuena camentó que yera preciso entamar un procesu de diálogu y d'entendimientu con otres fuerces asturianistes y recuperar a militantes que dexaren la organización, y pa ello presentaron l'un d'avientu un manifiestu que col títulu "Pol Cambiu y la Renovación nel Partíu Asturianista" quería crear una corriente d'opinión dientro del PAS. Quince díes dempués, la directiva del PAS recoyía'l guante y reaccionaba mandando-yos a caún de los críticos un burofax en que se-yos alvertía que taben suspensos de militancia y que teníen abiertu espediente sancionador.

Ello nun significaba que los 18 firmantes del manifiestu tuvieren fuera del partíu, pero na corriente d'opinión nun s'enfotaben en qu'hubiere una solución al asuntu que nun acabare n'espulsión, y dellos camentaben que s'esperaría hasta en pasando les elecciones pa poder llibrase d''ellos "pela puerte d'atrás". La carta que recibió Balbuena ye la confirmación d'eses sospeches. Agora queda por ver qué van facer los críticos, yá ensin carné nin derechu al votu na organización