El paru medra n’agostu en 801 persones pa sumar un total de 93.943 desemplegaos n'Asturies

Asturies finó agostu con 801 paraos más qu’en xunetu, lo que supón una medra del 0,86 por cientu. Los datos son más preocupantes si se comparen colos d’hai un añu: el país cuenta con 14.570 desemplegaos más (una xuba del 18,36).

Esta medra del paru nel país sitúa'l total del país en 93.943 y supera por poco la media estatal, asitiada nun 0,83 por cientu al crecer el desemplegu en 38.179 persones y situar el númberu de paraos total en 4.625.643, según los datos del Ministeriu d’Emplegu y Seguridá Social. Los territorios onde más creció’l desemplegu n’agostu foi en Murcia (2,47 por cientu), Euskadi (1,47 por cientu) y Catalunya (1,32 por cientu). Mentes, seis comunidaes consiguieron rebaxar les cifres de paru: Galicia (-1,13 por cientu), La Rioja (-0,99 por cientu), Navarra (-0,89 por cientu) Illes Balears (-0,75 por cientu), Canarias (-0,39 por cientu) y la ciudá autónoma de Ceuta (0,38 por cientu).

No que respeuta a la variación añal, l’incrementu del desemplegu ye del 11,98 por cientu (494.707 persones). Nesta llista Asturies ocupa ún de los puestos principales, namái superada por Castilla-La Mancha (19,03 por cientu) y Castilla y Lleón (18,41 por cientu). Les comunidaes que presenten meyores datos, pese a la xuba, son Illes Balears (5,04 por cientu), Catalunya (6,54 por cientu) y la ciudá autónoma de Melilla (7,84 por cientu).