El paru baxó n'Asturies en 3.893 persones

|

El desemplegu cai a niveles del 2010.

Xunu zarróse n'Asturies con 3.893 paraos menos, asitiándose'l total de desemplegaos en 75.460 persones, lo que supón una mengua del 4,91 por cientu en comparanza col mes anterior. Ésti ye’l datu más baxu rexistráu dende agostu del 2010, cuando se contabilizaron 72.956 ciudadanos ensin trabayu.

Según los datos del Serviciu Públicu d'Emplegu Estatal fechos públicos güei pol Ministeriu d'Emplegu y Seguridá Social, la media estatal foi de -2,84 por cientu, siendo los territorios con más descensu Illes Balears (6,19 por cientu), Cantabria (6,12 por cientu) y Castilla y Lleón (5,81 por cientu). Nel llau contrariu tán Canarias, con una baxada del 1,20 por cientu, Andalucía (1,25 por cientu) y Murcia (1,65 por cientu).

A nivel interañal, el paru baxó n'Asturies en 7.993 persones, esto ye, un 9,58 por cientu, siendo la media estatal del 10,73 por cientu. El mayor descensu rexístralo tamién Illes Balears, con un 16,02 por cientu, siguío por Aragón (15,90 por cientu) y Catalunya (13, 04 por cientu), mientres que los más pequeños foron en Ceuta (2,82 por cientu), Melilla (4,39 por cientu) y Canarias (7,09 por cientu).

Otra manera, el númberu d’afiliaos a la Seguridá Social aumentó en 2.524 persones, un 0,70 por cientu, hasta algamar los 360.807 cotizantes. Al respeutive de xunu del 2016, Asturies cuenta con 7.980 afiliaos más, lo que supón una medría del 2,26 por cientu.

AdxuntuTamañu
PDF icon Datos del paru xunu 20171.65 MB
Contador Estadistiques