El paru baxó en tolos territorios menos n'Asturies

|

Datos del segundu trimestre del añu.

Según los datos de la Encuesta de Población Activa fecha pública pol INE, n'Asturies el paru medró en 5.800 persones en comparanza col trimestre anterior, lo que supón un 6,67 por cientu más de xente ensin emplegu. A esti datu negativu hai que sumar que'l nuesu país ye l'únicu del Estáu nel que crez el desemplegu, cola esceición única de Melilla (2,49 por cientu). Los meyores datos rexístrenlos Ceuta (-23,83 por cientu), Illes Balears (-20,80 por cientu) y Navarra (-20 por cientu), siendo la media estatal de -5,43 por cientu.

En términos interanuales, el paru baxó en 6.670 persones n'Asturies, lo que supón un descensu del 6,8 por cientu con respeuto al mesmu periodu del añu pasáu. La media estatal ye de -8,43 por cientu, siendo les comunidaes con meyores númberos Navarra (-22,46 por cientu) y Aragón (-18,71 por cientu), y les peores Extremadura (0,91 por cientu) y Euskadi (-1,85 por cientu). Nesti apartáu nun s'inclúin los datos Ceuta y Melilla al nun considerase significativos los porcentaxe de variación por ser cifres mui pequeñes.

El númberu de desemplegaos total nel país anguaño llega a les 93.000 persones, mentes que nel Estáu suma 5.149.000, con unes tases del 20,15 y del 22,37 por cientu, de manera respeutiva.

Contador Estadistiques