El Narcea entra per Estremadura

Ríu Narcea amenaza con llevar per delantre delles deheses estremeñes onde pacen los gochos.

L'encabezao d'esta noticia engaña, evidentemente. Nun ye que'l ríu del occidente astur saltare del calce y vaya tomar media península como si fore un "tsunami", sinon qu'una empresa, del Canadá por más señes, qu'opera baxo'l nome asturianu de "Río Narcea Gold Mines" (si, la mesma de les mines d'oru de Balmonte y Cangas) tien el proyectu d'abrir otra mina, esta de niquel, n'Aguablanca, na provincia de Badajoz.

La mina, que ta acabante de dala de pasu'l ministeriu de Mediu Ambiente, tien rabiaos a tolos ecoloxistes estremeños y andaluces y tamién a los vecinos que tendríen de sufrir la esplotación n'abertal, que pretende abrir furacos y crateres nun espaciu de 23 hectaries que ta atiestando con dos núcleos d'espaciu protexíu que se pretende que seyan reserva natural de la biosfera. Pa más aquello, l'abrir la mina diba alterar enforma la economía del llugar, una fastera privilexada onde la tasa de paro ta bien perbaxo de la media y la cría de gochu ye un negociu qu'aporta bien de perres a la xente del llugar.

Otramiente, la mesma empresa reconoz que la tasa de niquel nun ye mui grande, polo que la rentabilidá de la mina va ser tirando a baxa. La propia Río Narcea fala d'esplotar el yacimientu a un plazu d'once años por culpa d'esto, pero en casu de nun traer cuenta la mina podría abandonase primero, dexando de regalu una balsa d'estériles atacada de metal pesao en suspensión asemeyada a la que dexó Boliden. Más información nel web d'Ecoloxistes n'Acción d'Estremadura