El muséu naval d'Asturies recupera una lancha de 1.927

El Muséu Marítimu d'Asturies tien espuesta dende esta selmana una pieza enforma especial. Trátase de la lancha "La Bañuguera" una lancha del añu 1927 que ye la única superviviente d'una xeneración d'embarcaciones de madera qu'anduvieron pela costa asturiana nel primer terciu del sieglu.

Construyida nel astilleru lluanquín de "La Palacia" "La Bañuguera" ye agora la pieza más importante del muséu d'esta mesma localidá.

Guardada hasta anguaño nuna cochera polos heriedes d'Antón de Fresno, el patrón que la emplegó hasta 1965 "La Bañuguera" tien 6,80 metros d'eslora y conserva tol apareyu orixinal, incluyendo'l motor, una pieza de 3 caballos que lleva la firma de la empresa "Yeregui" de Zumaya (Guipuzcoa).

Según los familiares del amu, "La Bañuguera" fizo delles vegaes la costera del mariscu ente Bañugues y la Estaca Bares (Galicia), un viaxe llargu nel qu'una tripulación de cuatro persones echaba dos díes enteros en llegar hasta'l destín, parando a facer nueche pel camín.

Según los responsables del muséu, "La Bañuguera" ye una pieza única dafechu n'Asturies y en tola costa del cantábricu, y ello por distintes causes.

En primer llugar, l'antigüedá de la pieza, que namás la supera una lancha vasca del añu 1925. Ello ye que ye difícil alcontrar exemplares de barcos d'esti tamañu y característiques porque lo normal yera desfacese d'elles echándoles a quemar faciendo d'elles madera pa la cocina o, más catártico, echándoles a la foguera de San Xuan. Asina ye que'l casu de "La bañuguera" ye una feliz coincidencia que tien a los conservadores del muséu que nun posen de felicidá.

En segundu llugar, la lancha lluanquina ye un casu particular por ser el primer exemplu que se guarda de la lancha de pesca asturiana, un tipu que s'estrema claramente de les que se gasten en Galicia, que tienen la parte d'atrás matada, y de les vasques, que nun presenten el perfil de madera cubriendo la parte de la hélice que s'emplega n'Asturies y que val pa guardar l'elementu propulsor de golpes cuando se saca la lancha a tierra.

De fechu, "La Bañuguera" que de mano incorporaba una vela p'ayudar al motorín, ye un modelu de transición ente lo que ye una embarcación de remu y los modelos definitivos de motor, que cuayaron a un diseñu estandar yá nos años 60.

La presentación d'esta nueva pieza va coincidir cola apertura, d'equí a poco, de la segunda planta del muséu Marítimu, que yá tendría de tar abierta dende va un añu. El retrasu forzó'l pieslle del muséu, qu'agora yá ta abiertu otra vegada a la espera de dellos remates pa inaugurar l'ampliación