El Mavi NT La Calzada algama un ascensu que se-y resiste al Caudal

L'equipu xixonés de balonmanu femenín consiguió'l so oxetivu de xugar la campaña próxima na categoría máxima nuna fin de selmana na que'l Caudal nun pudo celebrar el saltu a Segunda División B. Mentes, l'Uviéu llega a la xornada cabera ensin opciones.

Al cuartu intentu, el Mavi Nuevas Tecnologías La Calzada algamó l'ascensu a la División d'Honor xunto col Balonmano Base Villaverde madrilanu tres ser el meyor equipu de la fase celebrada en Logroño. Les de Diego Lafuente superaron el vienres, na primer xornada, al Villaverde por 28-20 y el sábadu al Logroño Sporting La Rioja por 17-28, resultáu ésti últimu que-yos daba práuticamente plaza na máxima categoría: una derrota por quince goles ayeri col Balonmano Castellón valdría pa xubir. Finalmente el partíu finó con empate a 23 goles y les asturianes proclamábense campeones de la División d'Honor Plata.

D'esta forma, Asturies va contar con equipu na máxima categoría del balonmanu estatal un añu más. Esta temporada disputó la conocida Liga Loterías, por motivos publicitarios, el Jofemesa Oviedo, que descendió xunto col Aiala Zarautz.

Ensin fortuna nel Hermanos Antuña

Los que nun pudieron celebrar l'ascensu ayeri y van tener que dir pela vía llarga son los homes d'Iván Ania. El Caudal fixo un gran partíu y tuvo milenta ocasiones pa superar al Boiro, pero los gallegos aguantaron el 1-0 qu'Iván Fernández anotó nel primer 15 y fixeron historia al consiguir xubir a Segunda División B per primer vegada tres sumar un global de 2-1 na eliminatoria.

Va acompañar esta tarde nel bombu al Caudal l'UP Langreo, que derrotó al CD Alcalá por 2-0 con goles de Pablo Acebal, de penalti, y del refuerzu Pablo Álvarez, remontando'l 2-1 de la ida. La mala noticia foi la espulsión de Michu nel minutu 40 por doble mariella xunto col visitante Serrano, que nun principio va impidir la participación del uviedín na siguiente partíu de la fase d'ascensu. El Llangréu yá anunció que va recurrir la segunda tarxeta.

Pela so parte, Avilés y Marino quedaron eliminaos pese a que tuvieron opciones series de pasar de ronda. Los de Pablo Lago cayeron nuna llarga tanda de penaltis de 24 llanzamientos contra'l Lagun Onak tres empatar el 1-0 de la ida con un gol de Cristian, mentes qu'a los de Blas García sobraron-yos diez minutos de partíu, condenaos por un gol de Plá nel 80. D'esta forma, dambos equipos van continuar en Tercera División la temporada próxima.

L'Uviéu, ensin opciones

Tampoco llegaron bones noticies a Uviéu, yá que l'equipu dirixíu por Generelo perdía toda opción d'ascensu a Primera en La Romareda. La derrota por 1-0 con gol del ex sportinguista Guitián énte'l Zaragoza y otros resultaos positivos de los conxuntos d'arriba, dexen a los uviedinos a cuatro puntos del sestu puestu, qu'ocupa'l Girona y que da la oportunidá de xugar el play-off.

Pela so parte, l'Alavés, tres ganar 2-0 al Numancia, abandona la categoría de plata, que yá conoz un nuevu inquilín. Ye'l Reus, que ganó 1-0 al Racing (4-0 nel global) y que va debutar en Segunda na próxima campaña.