El maíz tresxénico llega a Asturies

L'otru añu, Asturies foi por primer vegada suelu pa plantaciones de maíz tresxénico. Énte l'anuncia oficial fecha pol Ministeriu d'Agricultura confirmando que n'Asturies se punxeren nel 2.003 seyes hectaries de maíz alterao xenéticamente, la protesta de los colectivos ecoloxistes nun tardó en llegar, y asina la Coordinadora Ecoloxista solicitó-y ayeri a la Conseyeria d'Agricultura del Principáu qu'esplique en que llugar se fizo la plantación y quien la dio de pasu, en cuantes que nun hebo autorización nin solicitú nenguna espublizada en BOPA. La Coordinadora tamién tien interés por saber si, en casu de que'l Principáu tuviere conocencia de la plantación, se fizo daqué control y seguimientu de la mesma y si s'alvirtió a les finques qu'atiestaben cola del maíz tresxénicu del riesgu que suponía. La Coordinadora Ecoloxistaespresó la so indignación por nun saber d'esta primer esperiencia con maíz tresxénico n'Asturies cuando esta organización llecva pidiéndo-y tolos años, dende 1998 , información a la Conseyería sobre la implantación de tresxénicos n'Asturies



La Coordinadora Ecoloxista alvierte nel comunicáu en que denuncia esti casu que la manipulación xenético ye "un xuegu mui arriesgáu" con "efectos imprevisibles y imposibles de controlar en cuentes que se llibera nel mediu un organismu tratáu xenéticamente". Ente los posibles efectos de los tresxénicos, los ecoloxistes falen de que puen desaniciar a les variedaes normales de la mesma especie y tamién dañar a otres especies vexetales y animales. Los tresxénicos puen tamién traer dañu pa la salú humana al enxertar nos alimentos que se producen con ellos alteraciones que puen ser tósiques o dañibles pa la salú humana. Por poner un casu, la Coordibadora fala de les reacciones al´rxiques a les nueves proteínes presentes nos alimentos tresxénicos .

Estes mesmes duldes compártenles cásique toles organizaciones ecoloxistes, que tamién ven nos tresxénicos namás qu'una aventura comercial de les grandes multinacionales de l'agricultura, que podríen algamar colos tresxénicos el monopoliu del mercáu de simiente, y non un intentu de meyorar la produción mundial d'alimentu col envís de desaniciar la fame nel tercer mundu, como dicen munches vegaes los productores de tresxénicos.

España ye anguaño l'únicu sociu de la UE que consiente que se planten tresxénicos a gran escala, anque tamién Alemaña planta daqué, pero mui poco. L'añu pasáu España, onde'l 7% del maíz que se produz ye de lo alterao xenéticamente, punxo un 33% más de suelu pa tresxénicos, dedicándose a estos cultivos de maíz tresxénico un total de 32.164 hectaries en tol estáu, colo que les 6 asturianes nun son más qu'un primer pasu. Nel mundu dedíquense yá a tresxénicos un total de 67,7 millones de hectáries, con una xuba del 15% nel 2.003. Los mayores centros mundiales productores de tresxénicos son l'Arxentina, que pon el 30% de la producción mundial, y xunta ella Sudáfrica, los Estaos Xuníos, Canadá, la China y el Brasil, que va poco dio de pasu'l cultivu de soya tresxénico. pa más información pu vese l'especial de Greenpeace sobre esti tema





.