El llabor de facer recuperación llingüística ensin oficialidá, ún de los temes polos que más s’interesó Yolanda Díaz

|
Xosé Antón González Riaño, Yolanda Díaz y Xosé Ramón Iglesias Cueva visita ALLA

La vicepresidenta segunda del Gobiernu estatal y ministra de Trabayu y Economía Social, Yolanda Díaz, visitó esti vienres l’Academia de la Llingua Asturiana (ALLA). Aconceyó con Xosé Antón González Riaño y Xosé Ramón Iglesias, amosó tar bien informada sobre la situación llingüística n’Asturies y interesóse por cuestiones como cómo facer recuperación llingüística ensin Llei de Normalización y oficialidá.

La visita de la política gallega a Asturies pa presentar el so proyeutu políticu Sumar ta despertando un gran interés mediáticu, y la so llegada al llar social de la institución tuvo acompañada de numberoses cámares y fótografos. El presidente de l’ALLA, González Riaño, recibió a Díaz na cai con un choque de manes en compañía del secretariu Iglesias Cueva, pa depués acompañala escaleres arriba a les instalaciones académiques.

Ellí saludó y fotografióse xunto colos emplegaos de l’ALLA, pa depués acceder a la sala principal pa tener un llargu aconceyamientu con González Riaño. Anque Sumar anunciara nun primer momentu la presencia de la vicepresidenta Marta Mori, finalmente participó xunto col presidente’l secretariu.

“Un trabayu de gran valir”

Les dos partes amosaron la so satisfaición depués del alcuentru. “L’Academia de la Llingua Asturiana fai un trabayu de gran valir pa fomentar l’usu del asturianu y protexer los derechos llingüísticos de los sos falantes. Güei n’Oviedo pudi conocer de primer mano esti llabor tan importante y al personal que la fai posible”, espresó Díaz, en castellanu, na so cuenta personal en Twitter.

Dende l’ALLA rescamplaron el conocimientu de la vicepresidenta sobre la situación llingüística n’Asturies y el compromisu amosáu pola cuestión llingüística nel Estáu, tresmitiendo en delles ocasiones la importancia que-y da a les cuestiones culturales na so idea d’España, motivu pol qu’escoyera a la institución académica como una de les sos poques paraes n’Asturies pa presentar el so proyeutu políticu. La gallega interesóse pola situación del idioma na Alministración, nos medios de comunicación y el so valir nel accesu a la función pública, y González Riaño y Iglesias Cueva rellataron-y el procesu de recuperación llingüística dende Conceyu Bable hasta anguaño, amás de detallar la estructura y el llabor de la institución, tanto na cuestión normativa como na tutela de los derechos llingüísticos.

Una de les cuestiones poles que más entrugó foi sobre cómo se pue facer recuperación llingüística ensin Llei de Normalización y oficialidá, momentu nel que los representantes académicos esplicaron el choque continuu esistente cola llexislación xeneral del Estáu, dalgo que nun soluciona la Llei de Promoción y Usu del Asturianu/Bable del 1998. Nesi sen, confesó tar enterada del fallíu procesu de reforma del Estatutu nesta llexislatura y valoró la oportunidá que s’abre en mayu p’algamar el reconocimientu de los derechos llingüísticos de los asturianos.

Collaboración nel futuru

González Riaño y Díaz finaron l’alcuentru col compromisu de caltener contautos y collaboración nel futuru. Darréu, la ministra acudió a El Manglar a entrevistase con trabayadores de los sectores productivos asturianos y de tarde va desplazase a Xixón pa vese cola alcaldesa Ana González Rodríguez y participar, a les 18 hores, nun actu d’escucha cola ciudadanía na pista cubierta de Cimavilla.

Na semeya, González Riaño, Díaz y Iglesias Cueva.

Contador Estadistiques