El Lealtad proclámase campeón invictu de Tercera División

El Llanera queda fuera de la llucha pol ascensu nuna categoría que recibe al Urraca, primer clasificáu en preferente, y al Navarro.

El Lealtad nun falló nel partíu decisivu col Llanera, que necesitaba ganar pa tener opciones de metese nes eliminatories pa xubir a Segunda División B y que'l Marino nun-y superara na diferencia global de goles, y superó al so rival por 3-0 a pesar de la presión que-y metió'l club de Lluanco, con una diana tempranera de Fassani, con tantos de Jorge (de penalti), Albuquerque y Saha. D'esta forma los de Samuel proclámense campeones con 90 puntos al algamar 26 trunfos, 12 empates y nenguna derrota, y conviértese nel únicu equipu de les categoríes estatales que llogra finar la temporada ensin perder.

El títulu de Tercera permite al conxuntu maliayu competir pol ascensu pela vía curtia, esto ye, a una eliminatoria, cola posibilidá de tener una segunda oportunidá nel casu de cayer elimináu. Esta tarde va tener llugar el sortéu en Las Rozas a partir de les 16.30 hores, comenzando primero cola Segunda División B pa siguir darréu cola Tercera.

Van entrar tamién nos bombos el Marino, como segundu, que finó tamién con 90 puntos tres ganar 4-1 al Praviano, diferencia insuficiente al necesitar un gol más pa superar al Lealtad; el Caudal (75), como terceru; y el CD Covadonga (73), como cuartu. Los mierenses derrotaron 0-3 al EI San Martín y los uvieínos 3-1 al Colunga.

Na parte baxa de la tabla, La Madalena perdió la categoría al nun ser quien a superar al descendíu Universidá d'Uviéu en Morcín (0-0). Aprovechóse d'esti pinchazu l'UD Gijón Industrial, que se salvó con un gol nel minutu 86 de Villa al Condal (2-1).

El Vallobín pierde'l campeonatu

La derrota del yá ascendíu Vallobín cola SD Colloto (0-1), que se xugaba evitar el descensu, dio'l títulu de Lliga de preferente al Urraca, que superó al Candás por 0-1. Acompañen a los dos equipos a Tercera'l Navarro, que tampoco nun falló col Astur (2-0).

Queden a la espera de posibles ascensos la SD Lenense y l'Avilés Stadium, qu'aspiraben a xubir nesta xornada cabera, el Titánico y el CD Tineo. Na zona baxa, pierden la categoría l'AD Ribadedeva, colista, l'históricu Ribadesella CF y l'Andés.

Na semeya, Albuquerque corre al centru del campu xunto con Saha tres marcar el segundu tantu del so equipu pola necesidá del Lealtad d'anotar la mayor cantidá de goles posibles. Semeya propiedá del Club Deportivo Lealtad.