El Gobiernu insiste al Executivu estatal pa qu'incentive'l consumu de carbón autóctonu

Pola alvierte de que'l sector ta cerca del colapsu énte l'ausencia d'iniciatives que fomenten la quema de mineral llocal.

El direutor xeneral de Minería y Enerxía tornó a encamentar ayeri al Gobiernu estatal pa qu'articule con urxencia un mecanismu que dea prioridá al consumu de carbón autóctonu. Isaac Pola acusó al Executivu en funciones d'incumplir el documentu 'Marcu d'actuación pa la minería del carbón y les zones mineres nel periodu 2013-2018' al nun habilitar un dispositivu alternativu al de restricciones por garantía de suministru, vixente hasta'l 31 d'avientu del 2014.

“Les dificultaes son paecíes pal conxuntu de les empreses privaes de resultes de l'ausencia d'un mecanismu que priorice'l consumu de carbón nacional”, sorrayó Pola tres aconceyar con representantes de la Compañía Minera Ástur Leonesa (CMAL), que ta acabante de presentar un Espediente de Regulación Temporal d'Emplegu (ERTE), y miembros del comité d'empresa. Un camín qu'esta empresa entama argumentando una previsión del descensu o inclusive l'anulación de la compra de carbón per parte de les llétriques, que tamién pretende siguir Unión Minera del Norte (Uminsa) según avanzaron el llunes los sos responsables.

Según espliquen dende'l Gobiernu la falta d'esti mecanismu, a la que se suma l'abaratamientu del carbón d'importación, provocó que les compañíes llétriques dexaren d'adquirir esti mineral. “Amás, los pidíos que realicen son discontinuos y axústense mes a mes, conduciendo al sector a una situación d'incertidume que se concreta nun riesgu de colapsu inminente”, añadió Pola, que tamién incidió na falta de compromisu cola minería per parte del Gobiernu estatal, al qu'encamentó a cumplir los alcuerdos firmaos y poner en marcha un dispositivu que dexe habilitar un espaciu térmicu pal carbón equivalente al 7,5 por cientu del mix de xeneración llétrica.

Nesti sen, aseguró que cualquier iniciativa p’averar el preciu de la tonelada de carbón nacional a la d'importación, en condiciones equivalentes de capacidá calorífica, va ser sofitada pol Executivu asturianu.

"La situación del sector nun almite esperes"

El conseyeru d'Empléu, Industria y Turismu, Francisco Blanco, axuntó col secretariu d'Estáu d'Enerxía, Alberto Nadal, el pasáu 29 de febreru. Nesi alcuentru, Nadal comprometióse a poner en marcha un mecanismu alternativu al de pagos per capacidá, refugáu pola Xunión Europea, pa incentivar la quema de carbón autóctonu. “Lo que reclamamos dende'l principiu ye que cualquier iniciativa se lleve alantre de manera inmediata, porque la situación del sector nun almite esperes y les empreses tán cerca del colapsu”, sorrayó Pola.