El Gobiernu homenaxea a Samuel Sánchez polos sos ésitos nel Tour

|

Francisco Álvarez-Cascos recibió esti vienres al ganador de la Montaña del Tour de Francia y d’etapa en Luz-Ardiden. El presidente del Gobiernu entregó-y una insinia d’Asturies al uviedín, que correspondió col maillot de puntos colloraos.
 
Sánchez acudió al actu acompañáu de la so muyer y de dellos representantes del equipu col que cuerre, l'Euskaltel-Euskadi, ente ellos el xerente y ex ciclista, Igor González de Galdeano, y el conseyeru delegáu, Alberto García Eurauzkin. El corredor asturianu mostróse agradecíu pol xestu del Executivu y, de siguío, fíxo-y entrega a Álvarez-Cascos del maillot de llíder de la Montaña del Tour, que va tar espuestu en dalgún llugar de la Presidencia del Gobiernu pa que lu vea tol que visite l'edificiu, según confirmó’l llíder de Foro Asturias Ciudadano (FAC).
 
El presidente confesóse aficionáu al ciclismu dende que “sentía pela radio los trunfos de Bahamontes nel Tour de 1959” y destacó la “tenacidá” de Samuel Sánchez, asina como'l fechu de que sía'l tercer cilista asturianu que xube al podiu de la ronda gala, depués de José Manuel Fuente ‘El Tarangu’ y Vicente López Carril, y el quintu que llogra una victoria d'etapa. Álvarez-Cascos tamién recordó’l fechu de qu'una decisión política tomada nel 1996 como ministru de Fomentu lu conduxera al actu d'esti vienres, algo que “nunca pensara”, en referencia al acuerdu con Retevisión pal surdimientu de la empresa Euskaltel col oxetivu de desarrollar les telecomunicaciones n’Euskadi.
 
Ésti foi un detalle que'l mesmu conseyeru delegáu de la compañía agradeció al ex ministru. Amás, destacó la personalidá y el caráuter del ciclista asturianu y refirióse a él como un símbolu que “xune a Asturies y a Euskadi”. Tal ye’l cariñu que tienen nesi país al campeón olímpicu de ciclismu en ruta que Sánchez va facer el saque d’honor nel Athletic-Rayo’l 28 d’agostu, primer partíu de Lliga en San Mamés del conxunto dirixíu por Bielsa.

Comentarios

Deprindi, Gabino!

Contador Estadistiques