El Gobiernu entama per primer vegada un actu institucional con motivu del 25 de mayu

Esti martes, nel Palaciu del Conde de Toreno, va celebrase un actu institucional conmemorativu del 25 de mayu del 1808, fecha de la declaración de soberanía de la Xunta Xeneral. La bandera va tener protagonismu nun eventu qu’anunciara en setiembre na Universidá d'Uviéu, depués del Día d’Asturies, el presidente Adrián Barbón.

“Esti martes 25 de mayu conmemoraremos lo asocedío nel 1808, cuando la Xunta Xeneral declaró la guerra a Napoleón Bonaparte. Per primer vegada celebraremos un actu institucional que se celebrará cada añu, yá que naquellos acontecimientos ta l’orixe de la nuesa bandera”, espresó anueche na rede social Twitter el socialista. L’actu, en concreto, va celebrase nel Palaciu Conde Toreno al meudía cola presencia de Marcelino Marcos, presidente de la Xunta Xeneral; l’alcalde d’Uviéu, Alfredo Canteli; y una representación de l’Asociación de Amigos del País de Asturias y de l’Asociación de Recreación Histórico Cultural de Asturias (ARHCA), según informó Europa Press.

Amás va proyeutase esta nueche la bandera, que s’adopta nesi llevantamientu, nel que’l pueblu asturianu declárase soberanu al traviés de la Xunta Xeneral, a partir d’una propuesta de diseñu de Gaspar Melchor de Xovellanos décades atrás, na fachada de Presidencia. Conceyu Bable recuperóla na década de los 70, hasta ser adaptada pol Gobiernu, que la oficializó nel 1990.