El Gobiernu activa’l Portal de Tresparencia na web institucional

|

Dende esti miércoles, la ciudadanía podrá consultar les nómines del presidente y de los conseyeros, ente otres informaciones, nel nomáu Portal de Tresparencia. L’Executivu trabaya na ellaboración de la Llei de Tresparencia.

L’activación d’esti portal ye una de les actuaciones contemplaes na estratexa qu’axuntará les polítiques de gobiernu abiertu, participación ciudadana y accesu dixital a l’Alministración. Según afirmen dende’l Gobiernu, esta ferramienta de la web institucional “meyora la calidá democrática de l’Alministración y facilita’l control permanente polos asturianos de caúna de les sos aiciones y decisiones”. Asina, los ciudadanos podrán consultar dende güei 69 capítulos d’un total de 80 qu’esixe l’Índiz de Tresparencia de les Comunidaes Autónomes (Incau), cola intención de completar el restu nes selmanes próximes. Amás, tamién van a tar a disposición de los usuarios una información amplia, dende la de los cargos eleutos y de designación política o del patrimoniu del páis, de los asuntos económicos y financieros, a la contratación de servicios, obras y suministros.

El Portal de Tresparencia divídese en cinco bloques: información institucional –onde se pueden ver los bienes patrimoniales del Conseyu de Gobiernu–, económica y financiera, rellaciones cola sociedá, contratación alministrativa, y ordenación del territoriu y mediu ambiente. El pasu siguiente d’esta estratexa entamada pol Executivu será l’aprobación, esti mesmu semestre, de la Llei de Tresparencia y Bon Gobiernu del Principáu, “cola que se diseñará un modelu de gobernanza y dignificación de l’aición pública; avanzaráse hacia una alministración abierta, con protagonismu direutu de los ciudadanos: y blindaránse les esixencies étiques, siempre suxetes a un proceso d’evaluación. Trátase, en definitiva, d’ellaborar un marcu llegal que garantice la salú democrática de la vida pública asturiana”.

 

Contador Estadistiques