El gas mexicano que quier desembarcar n'Asturies

La compañía mexicana Grupo Zeta Gas, que ta entamando a operar nel mercáu ibéricu, ta estudiando la posibilidá d´invertir nel noroeste de la península, onde quier poner una planta na que recibir el gas procedente del Mar del Norte, Golfu Pérsicu y norte d'África. El grupu empresarial orixinariu de México ta dedicáu al almacenamientu, vienda, tresporte y distribución de Gas Llicuao del Petroleu (GLP) con una facturación anual penriba los 2.000 millones de dólares y tien presencia nos Estaos Xuníos y en dellos países d´América Llatina. Zeta Gas tien preparáu l´entamu de l'actividá comercial nel próximu añu 2004 y l'oxetivu cimeru de la compañía ye arramplá-y con cuota de mercáu al actual líder y cásique monopolista del sector, Repsol Butanu. Pa facese una idega del mercáu de que tamos falando, el mercáu del butanu domésticu mueve al añu nel estáu l'equivalente a 100 millones de bombones de butanu de 12,5 kilos caúna.



Sagunto, Asturies y Galicia, que ye la que más suena como destín final de la instalación más importante de la compañía mexicana ,son los posibles allugamientos pa les infraestructures gasístiques que Zeta Gas precisa pa desarrollar la so actividá industrial nel terciu norte de la península.



Les infraestructures de gas de Zeta tendríen de repartise en dellos puntos xeográficos, anque la clave pasa por atopar un bon puertu con una importante capacidá d´almacenamientu. Como primer entrada na península, la casa mexicana yá tien en construcción una planta n'Escombreras (Cartagena-Murcia) que cuenta con echar a andar pal añu qu'entra, mientres que la segunda planta d'almacenamientu taría nel centru de la península, lo más fácil ye que seya en Madrid. La tercer planta, qu'atendería'l norte de la península, ye la qu'entovía nun tien allugamientu afitáu, teniendo la compañía trés posibilidaes, Galicia, Sagunto y San Xuan de Nieva L'allugamientu de la posible planta de Zeta n'Asturies ye San Xuan de Nieva (Castrillón) onde yá esti añu la compañía "Gas Zaragoza" filial de la multinacional mexicana presentó un proyectu pa poner una planta d'almacenamientu de GLP. Esta planta, que s'asitiaría bien cerca de la playa del Espartal, recibió un carráu d'alegaciones de partíos políticos y asociaciones ecoloxistes, anque tien un informe al favor de la Conseyería d'Industria. Fontes de la empresa dicen que'l so proyectu empresarial n'España crearía cerca de 2.000 puestos de trabayu ente emplegu directu y indirectu, de los que 50 sedríen pa la hipotética instalación n'Asturies.