El garrapiellu presentó la VII Olimpiada de Deportes Tradicionales

La Tertulia Cultural "El Garrapiellu"
presentó los conteníos y
actividaes de la VII Olimpiada de Deportes Autóctonos, que
va facese nel recintu del Pueblu d'Asturies de Xixón el fin de selmana del 27 y 28de
setiembre. El día 27 pela tarde va ser la Olimpiada infantil, que va incluyir tamién un conciertu del grupu Xentiquina, y el 28, en sesiones de mañana y tarde, la competición d'adultos. En total, van poder vese 40 modalidaes deportives, siendo pela mañana les prebes de bolos, en 8 modalidaes y les de tiru con gomeru, rana y llave, mientres que la tarde va ser pa les espectaculares carreres de cintes a caballu y pa les competiciones oficiales de la Federación Asturiana de Deportes Tradicionales, rescamplando ente elles la
competición de tiru de cuerda en pocera en categoría de 480 kilos, que va ser la que decida'l
Campeonatu d'Asturies de la especialidá.

la Olimpiada cuenta col patrociniu de delles entidaes, ente elles l'Ayuntamientu de Xixón y la Dirección Xeneral de Deportes del Principáu d'Asturies, y ta afitándose como ún de los eventos más importantes del calandariu del deporte asturianu, tanto por participación como pola asistencia de públicu. "El Garrapiellu" aprovechó l'actu de presentación pa dar a conocer dellos planes pal futuru, destacando la idega que tienen d'axuntar a deportistes cántabros, vascos y asturianos nuna exhibición conxunta. De ser, sedrá pal 2.006.