El Garrapiellu convoca'l so concursu de cuentos curtios

La Tertulia Cultural "El Garrapiellu" convoca'l so concursu de cuentos curtios. El certame, que llega con esta a la XIII edición, ye ún de los más prestixosos que se convoquen tanto por ser yá un clásicu como por tener un estoyu de ganadores nel que tan munchos nomes importantes de la lliteratura asturiana y pol importe del premiu, que va ser nesta edición de 900 euros, xunta un accesit de 300 euros.

Les bases apauten que tolos cuentos han tar redactaos dafechu en Llingua Asturiana, tando'l concursu empobináu a autores mayores de 16 años. El llargor de los trabayos nun será enxamás superior a les 12 fueyes mecanografiaes a doble espaciu, escrites per una sola cara, y el tema ye llibre dafechu. El plazu d'entrega de los trabayos ta abiertu hasta'l 10 de mayu de 2004 y tienen d'unviase a les señes de la Tertulia Cultural "El Garrapiellu" apartáu de correos 8133 - 33280 Xixón, nun sobre onde tien de marcase la referencia "XIII Concursu de Cuentos Curtios EL GARRAPIELLU". Nel sobre ha dir l'orixinal del cuentu col títulu xunta trés copies, baxo plica, amás d'otru sobre cola plica l'autor y el títulu del cuentu escritu per fuera, colos datos personales y un teléfonu de contactu. El concursu fállase'l 29 de mayu, y la Tertulia "El Garrapiellu" comprométese a espublizar los trabayos ganadores nun futuru volume xunta los ganadores d'otres ediciones.
Pablo Tejón Castañón con "Pretéritu imperfeutu" y Quique Faes con "Les fíes de Miguel Xuan" foron los ganadores del 2.003