El galipote ta dañando otra vegada a los páxaros

Añu y pico dempués de la catástrofe del Prestige, la nortiada entovía trai dacuando los resclavos de la marea prieto pa contra la costa. Asina, esta selmana delles playes asturianes, sobremanera nel conceyu de Muros de Nalón y la rodiada apaecieron estraes de manches de galipote, que tamién se posó a primeros de selmana pa la parte de Colunga.

L'apaición física del galipote tamién vieno acompañada esta selmana por una xuba de la mortalidá d'araos, la especie d'ave marina que más dañó'l fuel nos meses en que la marea prieto entafarraba tola costa. Miembros y collaboradores de la Coordinadora Ornitolóxica Asturiana vienen tola selmana dando parte de la cantidá d'araos muertos que se tan pañando nes playes y pedreros. Por poner dos casos, el miércoles recoyéronse siete exemplares solo en Llastres y ayeri otros 8 en Xixón. De mano, que muerran araos cuando vien una rabasera de frío como la que pasemos esta selmana ye normal, pero'l casu ye que cásique tolos animales que se tan recoyendo presenten restos de galipote apegaos, sobremanera na cloaca, lo que pon nello un puntu d'alarma. L'asuntu yá llegó hasta los responsables de la Conseyería, que ta estudiando reactivar el dispositivu de control de playes que funcionó l'añu pasáu y que, consiste en que la guardería recuerre la costa pañando los páxaros que va atropando pa dempués llevalos a analizar al Serida.

Anque de momentu tovía se ta a la espera de que la Conseyería unvie a los guardes, quien alcuentre un páxaru pue dar parte al serviciu 112 (llamada de baldre) o dexar l'ave nel cuartel de policía o Guardia Civil que-y quede más cerca con una nota especificando fecha y llugar onde se recoyó.