El galipote que nun ye del Prestige

Les autoridaes franceses tan acabante de dexar marchar del Puertu de Brest, depués de pagar una fianza de 300.000 euros al barcu de bandera Búlgara Dobrudja, un cargueru de 9.000 tonelaes que salió la otra selmana del puertu d'Avilés con dirección a Holanda. Cuando'l barcu pasaba enfrente de la costa bretona, un avión de reconocimientu columbró una mancha de galipote qu'abarcaba cerca de 5 kilómetros, asociando inmediatamente'l vertíu cola cercanía del barcu búlgaru, que mandaron metese a puertu con escolta militar baxo l'acusación de vaciar les sentines y demás tanques d'aceite puerco en medio la mar, una práctica que, anque illegal, dase muncho na marina mercante.

Y ye que, anque'l galipote del Prestige esconsoñó la sensibilidá del gran públicu por estos temes -y, según parez, el celu de les autoriddaes- lo cierto ye que lo más de la contaminación por hidrocarburos na mar vien precisamente d'esta práctica, cuando la llei manda vaciar les sentines en puertos que tean acondicionaos pa esti llabor.

Al dicir de les autoridaes franceses, de los estudios que se ficieron comparando'l galipote de la mancha colo que llevaba'l barcu salió que concuellaben, colo que'l capitán y la compañía del barcu enfréntense agora a unes multa de 600.000 euros y 3 millones d'euros respectivamente por práctica contaminante nel xuiciu que va facese pa payares.