El galipote nun perdonó les elecciones

Mientres el pueblu asturianu pasaba peles urnes, el galipote seguía posándose nes playes y pedreros del país. Un grupu de voluntarios de la Coordinadora Ornitolóxica d'Asturies anduvieron esti fin de selmana pela rodiada del Cabu Peñes, onde la llegada de manches de galipote nun apara. N'Arnao en conceyu de Castrillón, los menguaos equipos de llimpieza echaron la mañana atropando galipote pa que depués la mareavolviere a dexar la playa estrada de negro pa pela tarde. En Salinas, una de les más afectaes, atropose galipote enforma el sábadu pela tarde. El sablón de Xagó tamién presenta una situación mala, col galipote afundiendo nente la arena mientres los pequeños grupos de llimpieza nun dan abastu. Pal oriente del Cabu Peñes la situación ta más tranquila en cuantes a aporte de galipote, pero ello nun quitó pa qu'entrare a Zeluán, Carranques y Bañugues, onde la playa taba llimpia pero había pedreros entafarraos, al dicir de los observadores.