El galipote, na cadena alimentaria

Esti vienres 21 de febreru, los profesores de la Facultá de Bioloxía encargaos de facer el muestreu oceanográficu de tolos meses apuntaron que los más de los copépodos, frasca de microcrustáceos, qu'apaecieron nes redes del muestréu taben entafarraos de galipote, rexistrándose un tantu per cientu muncho mayor de copépodos engalipotiaos que na saca que fixeron en xineru. Según los científicos, ello ye señal de que'l galipote yá ta esmigayao en partes de tamañu micrométricu que tan enxertándose nes estayes más básiques de la cadena alimentaria.Otramiente, aprovechando'l viaxe en barcu que se fizo pa garrar les muestres de la mar, los profesores de la facultá entamaron un esperimentu col oxetu de calcular la mortalidá que causa nos páxaros el galipote del Prestige. Pa facer esti esperimentu, los científicos precisaron d'echar a la mar 150 tacos de madera, caún d'ellos con una placa identificativa y un códigu individual escritu. Los tacos echáronse en garapiellos de 50 en tres llugares distintos na redolada de la costa de Cuideiru. Casu d'atopase ún na playa, los profesores de la Facultá de bioloxía agradecen que se dea parte llamando al númberu de teléfonu que traen escritu